Májiliste osyndai ózgertý engizilgen mádeniet salasyna qatysty zań jobasy maquldandy.
Álem-jálem boianyp, taspaǵa basyp qoiǵan jazbamen án aitatyn ánshilerdi synap bir jónge salatyn zańnyń qajettigi týraly aitylǵany qai zaman?
Májilismender maquldaǵan zańǵa sáikes, endi kez kelgen kontsert uiymdastyrylmai turyp, fonogrammanyń qoldanylatyny nemese jandy daýysta oryndalatyny aldyn ala habarlanýy tiis.
– Bul uiymdastyrýshy men oryndaýshynyń arasyndaǵy kelisimshart boiynsha retteledi. Eger bul kelisimshartta osy talaptar buzylatyn bolsa, onda ákimshilik jaýapkershilik tartylady, – dedi QR Mádeniet jáne sport ministri Aqtoty Raiymqulova.
Tóreǵali siiaqty kórermenge zeký de endi zańmen qýdalanady. Óitkeni ártisterdiń sahnalyq mádenieti de zańmen bekitilgen. Kórermendi syilaýǵa, ádep talaptaryn saqtaýǵa, ashyq-shashyq kiinbeýge bári mindetteledi.
Bul shart sheteldik estrada juldyzdaryna da qatysty. Osylaisha sheneýnikter óner salasyn elekten ótkizip, ótirik ónerpaz ben shynaiy darynnyń ara-jigin zań júzinde ajyratyp almaq.
– Menińshe, naǵyz óner – aitys. Aitysqa fonogrammamen shyǵyp kórińizshi. Onda eshqashanda, eshqandai fonogramma bola almaidy. Sol úshin shyǵar, bizdiń halqymyz aitysty erekshe jaqsy kóredi. «Qisyq arba jol buzady» demekshi, óner árqashan da taza bolýy kerek, – dep Májilis Spikeri Nurlan Nyǵmatýlin oiyn ortaǵa saldy.
Alaida sahna juldyzdary: «Estrada men dástúrli ónerdi salystyrý – qisynsyz» dep otyr. Sebebi, klassikalyq óner men estradanyń mektebi basqa.
– Jasyratyn nesi bar? Jandy daýys dep suraǵan jerde jandy daýyspen shyǵamyz. «Oibai, Aigúl, apparat qirap tur» degen jerde fonogrammamen shyǵýymyzǵa týra keledi. Óitkeni ol kezde zań qabyldanǵan joq bolatyn. Al zań bolǵannan keiin, qandai bolǵanda da jandy daýysta shyǵýǵa týra keledi. Biraq oǵan tehnika sai bolyp jatsa, qaneki, – depti ánshi Aigúl Imanbaeva.
Ázirbaijan, Ózbekstan, Túrkmenstan siiaqty elderde fonogrammaǵa túbegeili tyiym salynǵan. Aqtoty Raiymqulovanyń sózinshe, ázirge ondai talapty engizý bizdiń el úshin áli erte.
Kontsertterdiń jandy nemese jazylǵan daýysta bolatyny jaily aqparattandyrý ónerdegi tazalyqqa umtylǵan alǵashqy qadam bolyp tur. Májilis maquldaǵan zań jobasyna sáikes, endi ár óńirde kórkemdik keńes qurylady.
Sebebi, búginde barlyq oblystyń mádeni ahýalyn jalǵyz respýblikalyq kórkemdik keńes qadaǵalaýy múmkin emes. Zań qabyldansa mindeti birshama jeńildemek. Ol jaǵy jáne jalpy mádenietke qatysty jańa zańnyń bekitilip, kúshine enýi senatorlardyń shiraqtyǵyna tikelei bailanysty.
