Májilis otyrysynan keiin depýtat Baqytjan Bazarbek memlekettik qyzmettiń jaǵdaiyna qatysty óz pikirin bildirdi, dep habarlaidy Dala News.
Ol memlekettik qyzmet júiesinde túbegeili ózgeris qajet ekenin atap ótti.
«Búginde memlekettik qyzmettiń abyroiy tómendep ketkeni baiqalady. Onyń negizgi sebepteriniń biri - júielik, túbegeili máselelerdiń bolýy. Eń aldymen, memlekettik qyzmetkerdiń oilaý paradigmasyn ózgertý qajet. Memlekettik qyzmetshi basshyǵa emes, halyqqa qyzmet etýi tiis. Alaida qazirgi tańda kóptegen qyzmetker bul qaǵidany durys túsinbeidi. Jas mamandar memlekettik qyzmetke kelgende, kóbine basshynyń tapsyrmalaryn oryndaýdy basty mindet dep qabyldaidy. Nátijesinde, halyqqa qyzmet kórsetý ekinshi orynǵa ysyrylyp qalady», - dep atap ótti depýtat.
Depýtattyń aitýynsha, memlekettik qyzmettiń basty mindeti - halyqtyń máselesin sheshý.
«Shyn máninde, memlekettik qyzmettiń negizgi maqsaty azamattardyń ótinishteri men máselelerin sheshý. Halyqpen tikelei bailanys ornatý, olardyń suranystaryna der kezinde jaýap berý basty mindet bolýy tiis. Biraq tájiribede keibir qyzmetkerler halyqpen kezdesýden qashqaqtaidy, jaýapkershilikti ózge qyzmetkerlerge ysyra salady. Bul durys emes. Memlekettik qyzmetker halyqtan qoryqpaýy kerek, kerisinshe, halyqpen turaqty bailanysta bolýy tiis. Atqarylyp jatqan jumystar týraly ashyq aqparat berip, qoǵam aldynda esep bere alýy qajet», - dedi Bazarbek.
Sonymen qatar ol Qazaqstanda sheneýnikterdiń jaýapkershilik mádenieti qalyptaspaǵanyn aitty.
«Qatelik bolǵan jaǵdaida, ony moiyndap, halyqtan keshirim suraý mádenietin qalyptastyrý mańyzdy. Mysaly, damyǵan elderde memlekettik qyzmetshiler qatelikteri úshin qoǵam aldynda ashyq túrde jaýap beredi. Sondyqtan memlekettik qyzmet júiesinde túbegeili ózgeris qajet. Halyq memlekettik qyzmetshilerdiń jumysyna baǵa beretin negizgi ólshemge ainalýy tiis. Basshynyń tapsyrmalaryn oryndaý jetkiliksiz, eger halyqtyń kóńili tolmasa, onda mundai jumysty qanaǵattanarlyq dep baǵalaýǵa bolmaidy. Halyqtan keshirim suraǵan ákim ne ministr joq», - dep qorytyndylady depýtat.
Bazarbek memlekettik qyzmetkerdiń jumysyn baǵalaý úshin ashyq júie engizý qajet ekenin de atap ótti.
