مەجٸلٸس وتىرىسىنان كەيٸن دەپۋتات باقىتجان بازاربەك مەملەكەتتٸك قىزمەتتٸڭ جاعدايىنا قاتىستى ٶز پٸكٸرٸن بٸلدٸردٸ, دەپ حابارلايدى Dala News.
ول مەملەكەتتٸك قىزمەت جٷيەسٸندە تٷبەگەيلٸ ٶزگەرٸس قاجەت ەكەنٸن اتاپ ٶتتٸ.
«بٷگٸندە مەملەكەتتٸك قىزمەتتٸڭ ابىرويى تٶمەندەپ كەتكەنٸ بايقالادى. ونىڭ نەگٸزگٸ سەبەپتەرٸنٸڭ بٸرٸ - جٷيەلٸك, تٷبەگەيلٸ مەسەلەلەردٸڭ بولۋى. ەڭ الدىمەن, مەملەكەتتٸك قىزمەتكەردٸڭ ويلاۋ پاراديگماسىن ٶزگەرتۋ قاجەت. مەملەكەتتٸك قىزمەتشٸ باسشىعا ەمەس, حالىققا قىزمەت ەتۋٸ تيٸس. الايدا قازٸرگٸ تاڭدا كٶپتەگەن قىزمەتكەر بۇل قاعيدانى دۇرىس تٷسٸنبەيدٸ. جاس ماماندار مەملەكەتتٸك قىزمەتكە كەلگەندە, كٶبٸنە باسشىنىڭ تاپسىرمالارىن ورىنداۋدى باستى مٸندەت دەپ قابىلدايدى. نەتيجەسٸندە, حالىققا قىزمەت كٶرسەتۋ ەكٸنشٸ ورىنعا ىسىرىلىپ قالادى», - دەپ اتاپ ٶتتٸ دەپۋتات.
دەپۋتاتتىڭ ايتۋىنشا, مەملەكەتتٸك قىزمەتتٸڭ باستى مٸندەتٸ - حالىقتىڭ مەسەلەسٸن شەشۋ.
«شىن مەنٸندە, مەملەكەتتٸك قىزمەتتٸڭ نەگٸزگٸ ماقساتى ازاماتتاردىڭ ٶتٸنٸشتەرٸ مەن مەسەلەلەرٸن شەشۋ. حالىقپەن تٸكەلەي بايلانىس ورناتۋ, ولاردىڭ سۇرانىستارىنا دەر كەزٸندە جاۋاپ بەرۋ باستى مٸندەت بولۋى تيٸس. بٸراق تەجٸريبەدە كەيبٸر قىزمەتكەرلەر حالىقپەن كەزدەسۋدەن قاشقاقتايدى, جاۋاپكەرشٸلٸكتٸ ٶزگە قىزمەتكەرلەرگە ىسىرا سالادى. بۇل دۇرىس ەمەس. مەملەكەتتٸك قىزمەتكەر حالىقتان قورىقپاۋى كەرەك, كەرٸسٸنشە, حالىقپەن تۇراقتى بايلانىستا بولۋى تيٸس. اتقارىلىپ جاتقان جۇمىستار تۋرالى اشىق اقپارات بەرٸپ, قوعام الدىندا ەسەپ بەرە الۋى قاجەت», - دەدٸ بازاربەك.
سونىمەن قاتار ول قازاقستاندا شەنەۋنٸكتەردٸڭ جاۋاپكەرشٸلٸك مەدەنيەتٸ قالىپتاسپاعانىن ايتتى.
«قاتەلٸك بولعان جاعدايدا, ونى مويىنداپ, حالىقتان كەشٸرٸم سۇراۋ مەدەنيەتٸن قالىپتاستىرۋ ماڭىزدى. مىسالى, دامىعان ەلدەردە مەملەكەتتٸك قىزمەتشٸلەر قاتەلٸكتەرٸ ٷشٸن قوعام الدىندا اشىق تٷردە جاۋاپ بەرەدٸ. سوندىقتان مەملەكەتتٸك قىزمەت جٷيەسٸندە تٷبەگەيلٸ ٶزگەرٸس قاجەت. حالىق مەملەكەتتٸك قىزمەتشٸلەردٸڭ جۇمىسىنا باعا بەرەتٸن نەگٸزگٸ ٶلشەمگە اينالۋى تيٸس. باسشىنىڭ تاپسىرمالارىن ورىنداۋ جەتكٸلٸكسٸز, ەگەر حالىقتىڭ كٶڭٸلٸ تولماسا, وندا مۇنداي جۇمىستى قاناعاتتانارلىق دەپ باعالاۋعا بولمايدى. حالىقتان كەشٸرٸم سۇراعان ەكٸم نە مينيستر جوق», - دەپ قورىتىندىلادى دەپۋتات.
بازاربەك مەملەكەتتٸك قىزمەتكەردٸڭ جۇمىسىن باعالاۋ ٷشٸن اشىق جٷيە ەنگٸزۋ قاجەت ەكەنٸن دە اتاپ ٶتتٸ.
