Eń iri importtaýshy el bolyp tabylatyn Qytaidyń suranysy 2027 jyly óz shyńyn igeretinine qaramastan, munaiǵa degen álemdik suranys aldaǵy onjyldyqtyń sońyna deiin arta beredi. Búgin, 17 maýsymda Halyqaralyq energetikalyq agenttigi (HEA) osylai dep habarlady. Bul týraly Reuters jazady, dep habarlaidy Dalanews.kz.
Agenttik óziniń bul boljamyna arzan benzinniń bolýy men elektromobilder qoldanysy baiaý júrgizilip jatýyna bailanysty AQSh-tyń munai tutynysyn áli qoldaýy negiz bolatynyn aitady.
HEA osy onjyldyqta suranys óz shyńyna jetedi degen boljamyn ózgertken joq. Al bul boljam OPEK óndirýshiler tobynyń pikirine múldem qaishy keledi. Munaiǵa degen bir táýliktegi suranys kólemi 2029 jylǵa qarai 105,6 million barrelge jetedi, al 2030 jyly, HEA-nyń esebinde kórsetilgendei, azdap tómendeidi. Sonymen qatar, jahandyq óndiristik qýattylyq 2030 jylǵa qarai táýligine 5 mln barrelden 114,7 mln barrelge deiin artady dep boljanady.
Izrail men Iran arasyndaǵy qaqtyǵys Taiaý Shyǵystan tasymal qaýip-qaterin arttyryp, bul óz kezeginde munai baǵasyn 5% -ǵa joǵarlatyp, bir barrel quny 74 dollardan asýyna túrtki boldy.
"Irgeli kórsetkishterge súiene otyryp, munai naryqtary aldaǵy jyldary jaqsy qamtamasyz etiletin siiaqty. Biraq sońǵy oqiǵalar munai jetkiziliminiń qaýipsizdigi úshin mańyzdy geosaiasi táýekelder baryn kórsetedi", — dedi HEA atqarýshy direktory Fatih Birol málimdemesinde.
