Qyzylorda oblysynyń ákimi Nurlybek Nálibaev Qazaqstan fýtbol federatsiiasynyń jarystardy uiymdastyrý direktory Baqytjan Pazylhaiyrmen birge Ortalyq stadiondaǵa baryp, jaýapty basshylarǵa tapsyrmalar júktedi, - dep habarlaidy Dalanews.kz.
Qyzylordadaǵy 11 myń oryndyq Ortalyq stadion jaqyn kúnderi ashylady dep kútilýde. Jańa nysan halyqaralyq standarttarǵa, ÝEFA talaptaryna sai, sońǵy úlgidegi zamanaýi quraldarmen jabdyqtalǵan.
Sport ǵimaratynyń jalpy aýmaǵy 20 myń sharshy metr, jasyl alańnan bólek, boks, kúrestiń úsh túriniń, atap aitqanda, dziýdo, grek-rim, erkin kúres, fitnes, sporttyq gimnastika, taekvondo jáne aýyr atletika zaldarynan turady. Kelýshilerge jyl on eki ai sapaly qyzmet kórsetý úshin barlyq múmkindik bar.
Úsh qabatty ǵimarattyń birinshi qabatynda jattyǵý zaldary, ekinshi qabatynda ákimshilik bólmeler, úshinshi qabatynda sportshylar úshin jáne aýqymdy jiyndar ótkizýge arnalǵan bólmeler qarastyrylǵan.
Halyqaralyq dárejedegi aýqymdy oiyndarǵa daiyn. Ashylý saltanaty qarsańynda jańa stadionnyń fýtbol alańy FIFA-nyń testileýinen ótip, joǵary deńgeili QUALITY PRO sertifikatyna ie boldy.
Búgin “Arai siti mol” saýda ortalyǵynda finaldyń bas kýbogy Syr jurtshylyǵyna tanystyryldy. Oblys turǵyndary kýbokty qazannyń 4-ne deiin saýda ortalyǵyna baryp kóre alady.
Oblys ortalyǵynda «Qyzylorda Arena» kópbeiindi sport kesheni de salynýda. Onda olimpiadalyq standarttarǵa sai 50 metrlik bassein, Álem jáne Aziia chempionattaryn ótkizýge arnalǵan 2500 oryndyq zal, olimpiadalyq sport túrlerine arnalǵan jattyǵý zaldary bolady.Qurylysy 2026 jyldyń ekinshi jartyjyldyǵynda aiaqtalady.
Óńir sportyn damytýda atqarylǵan aýqymdy jumystarǵa toqtalsaq, sońǵy úsh jylda 20 sport kesheni ashyldy. «Aýyl – el besigi» baǵdarlamasymen taǵy 6 sport kesheni paidalanýǵa beriledi. «Qazaqstan halqyna» qorynyń demeýshiligimen 2 mlrd. 900 mln. teńgege múmkindigi shekteýli jandarǵa arnalǵan dene shynyqtyrý-saýyqtyrý kesheni boi kóterip keledi. Biyl qordyń qoldaýymen Shieli, Jalaǵash aýdandaryndaǵy jańa sport keshenderi kelýshilerge qyzmet kórsete bastady.
