Biylǵy sanaqta qaǵaz-qalam qoldanylmaidy. Barlyǵy elektrondy túrde. Ol úshin milliardtan astam teńgege 27 myń planshet satyp alynǵan. Biylǵy sanaqtyń basty ereksheligi osy.
Ekinshisi, sanaqshynyń kómeginsiz, úide otyryp-aq, arnaiy saitta óz betińmen málimet toltyrýǵa bolady.
– Arnaiy internert saitqa kirip, árkim, ár adam óz betimen toltyra alady. Ol óte yńǵaily. Óitkeni, kóp adam úiine sanaqshyny kirgizgisi kelmeidi, – deidi Statistika komitetiniń tóraǵasy Nurbolat Aidapkelov
Aita ketýimiz keerk, aldyńǵy sanaq málimeti burmalandy dep mamandardyń synaǵany esimizde. Belgili demograf, marqum Maqash Tátim sol sanaq qorytyndylarynyń saraptamalyq material retinde qoldanýǵa jaramai qalǵanyn aqparat kózderinde ashyq aitqan bolaty.
– 2009 jyly bolǵan sanaqtyń búkil qateligin eskerdik. Qazirgi sanaq, biz oilaimyz, barlyq talaptarǵa sáikes. Aqaý bolmaýy kerek. Planshettiń ishinde konteiner bolady. Sonyń ishinde saqtalynady. Ony eshkim buza almaidy. Ony ary qarai ózimizdiń arnalar arqyly ortalyq serverge jiberemiz, – dedi Nurbolat Aidapkelov.
Al Statistika komitetiniń burynǵy tóraiymy Anar Meshimbaeva ótken sanaqta 700 million teńgeden astam biýdjet aqshasyn jymqyrdy dep aiyptalyp, tórt jyl ómirin abaqtyda ótkizip, aldyńǵy jyly ǵana bostandyqqa shyqqan bolatyn.
Bul joly komitet memlekettik satyp alýdan bas tartyp otyr eken. «Bizdiń statistika komitetiniń jumysshylary memlekettik satyp alý protsesine qatyspaidy. Elektrondy túrde búkil satyp alýlar júrgiziledi. Biz ózimizge qandai nárse kerek, sonyń bárin beremiz. Ary qarai júie kim utyp aldy, sony bizge kórsetedi. Biz sonymen kelisimge otyryp, ary qarai jumys isteimiz» deidi komitet tóraǵasy.
Statistika komiteti 2009 jyly árbir qazaqstandyqty sanaýǵa 2 dollar 90 tsent ketse, bul joly nebári 1 dollar 20 tsent jumsalatynyn aitýda.
Alaida jalpy biýdjetke kelgende biylǵy naýqanǵa 8,2 milliard teńge, iaǵni, aldyńǵydan 2 milliard teńgege jýyq artyq jumsalmaq. Onyń 3,7 milliardy jalaqyǵa beriledi. 11 jyl burynǵy sanaqta halyq sany 16 millionnan sál ǵana asqan bolatyn.
Ázirge Statistika komitetiniń saitynda 18 jarym millionǵa jýyqtap turmyz. Al respýblikalyq naýqannyń áýelgi málimetteri jeltoqsanda jariialana bastaidy da, sońǵy tolyqqandy qorytyndysy 2022 jyly belgili bolady.
Erbol TURYMBET
