بيىلعى ساناقتا قاعاز-قالام قولدانىلمايدى. بارلىعى ەلەكتروندى تۇردە. ول ءۇشىن ميللياردتان استام تەڭگەگە 27 مىڭ پلانشەت ساتىپ الىنعان. بيىلعى ساناقتىڭ باستى ەرەكشەلىگى وسى.
ەكىنشىسى، ساناقشىنىڭ كومەگىنسىز، ۇيدە وتىرىپ-اق، ارنايى سايتتا ءوز بەتىڭمەن مالىمەت تولتىرۋعا بولادى.
– ارنايى ينتەرنەرت سايتقا كىرىپ، اركىم، ءار ادام ءوز بەتىمەن تولتىرا الادى. ول وتە ىڭعايلى. ويتكەنى، كوپ ادام ۇيىنە ساناقشىنى كىرگىزگىسى كەلمەيدى، – دەيدى ستاتيستيكا كوميتەتىنىڭ ءتوراعاسى نۇربولات ايداپكەلوۆ
ايتا كەتۋىمىز كەەرك، الدىڭعى ساناق مالىمەتى بۇرمالاندى دەپ مامانداردىڭ سىناعانى ەسىمىزدە. بەلگىلى دەموگراف، مارقۇم ماقاش ءتاتىم سول ساناق قورىتىندىلارىنىڭ ساراپتامالىق ماتەريال رەتىندە قولدانۋعا جاراماي قالعانىن اقپارات كوزدەرىندە اشىق ايتقان بولاتى.
– 2009 جىلى بولعان ساناقتىڭ بۇكىل قاتەلىگىن ەسكەردىك. قازىرگى ساناق، ءبىز ويلايمىز، بارلىق تالاپتارعا سايكەس. اقاۋ بولماۋى كەرەك. پلانشەتتىڭ ىشىندە كونتەينەر بولادى. سونىڭ ىشىندە ساقتالىنادى. ونى ەشكىم بۇزا المايدى. ونى ارى قاراي ءوزىمىزدىڭ ارنالار ارقىلى ورتالىق سەرۆەرگە جىبەرەمىز، – دەدى نۇربولات ايداپكەلوۆ.
ال ستاتيستيكا كوميتەتىنىڭ بۇرىنعى ءتورايىمى انار مەشىمبايەۆا وتكەن ساناقتا 700 ميلليون تەڭگەدەن استام بيۋدجەت اقشاسىن جىمقىردى دەپ ايىپتالىپ، ءتورت جىل ءومىرىن اباقتىدا وتكىزىپ، الدىڭعى جىلى عانا بوستاندىققا شىققان بولاتىن.
بۇل جولى كوميتەت مەملەكەتتىك ساتىپ الۋدان باس تارتىپ وتىر ەكەن. «ءبىزدىڭ ستاتيستيكا كوميتەتىنىڭ جۇمىسشىلارى مەملەكەتتىك ساتىپ الۋ پروسەسىنە قاتىسپايدى. ەلەكتروندى تۇردە بۇكىل ساتىپ الۋلار جۇرگىزىلەدى. ءبىز وزىمىزگە قانداي نارسە كەرەك، سونىڭ ءبارىن بەرەمىز. ارى قاراي جۇيە كىم ۇتىپ الدى، سونى بىزگە كورسەتەدى. ءبىز سونىمەن كەلىسىمگە وتىرىپ، ارى قاراي جۇمىس ىستەيمىز» دەيدى كوميتەت ءتوراعاسى.
ستاتيستيكا كوميتەتى 2009 جىلى ءاربىر قازاقستاندىقتى ساناۋعا 2 دوللار 90 سەنت كەتسە، بۇل جولى نەبارى 1 دوللار 20 سەنت جۇمسالاتىنىن ايتۋدا.
الايدا جالپى بيۋدجەتكە كەلگەندە بيىلعى ناۋقانعا 8،2 ميلليارد تەڭگە، ياعني، الدىڭعىدان 2 ميلليارد تەڭگەگە جۋىق ارتىق جۇمسالماق. ونىڭ 3،7 ميللياردى جالاقىعا بەرىلەدى. 11 جىل بۇرىنعى ساناقتا حالىق سانى 16 ميلليوننان ءسال عانا اسقان بولاتىن.
ازىرگە ستاتيستيكا كوميتەتىنىڭ سايتىندا 18 جارىم ميلليونعا جۋىقتاپ تۇرمىز. ال رەسپۋبليكالىق ناۋقاننىڭ اۋەلگى مالىمەتتەرى جەلتوقساندا جاريالانا باستايدى دا، سوڭعى تولىققاندى قورىتىندىسى 2022 جىلى بەلگىلى بولادى.
ەربول تۇرىمبەت
