Eks-depýttar bolsa «Ana turǵan Balqan taý, oǵan bizde barǵan taý» degendei kisimsip áleýmettik jelide jazba qaldyrýda.
Depýtatty bylai qoiyp, sol depýtattyń shabarmandary bolǵan kómekshileri de «depýattyń kómekshisi» degen kýálikterin jelige jarysa jariialap jatyr. Netken mansapqorlyq deseńshi.
Al áleýmettik jelide otyratyn eks-depýtattar «osydan týra bálenbai jyl buryn «halyqtyń qoldaýymen» (shyndyǵynda Elbasy Nazarbaevtyń qoldaýymen dep aitpai ma?) depýtat bolyp edik» dep áleýmettik jelide kósilip post jazyp jatyr, jazyp jatyr.
Osyǵan deiin depýtattyq mandatqa ie bolǵan «halyq qalaýlylaryn» atamyz Nazarbaev «Nur Otannyń» tizimimen ótkizip, bilikke qarsy «máý» dep bira aýyz sóz aita almaityn depýtattardy jasaqtap kelgenin bárimiz bilemiz ǵoi. Sondyqtan olardyń «halyqtyń qoldaýymen depýtat boldyq» dep aitatyndai jóni joq.
Táýelsiz Qazaqstannyń tarihynda Nazarbaevtyń aitqanyna kónbeitin, aidaýymen júrmeitin zań shyǵarýshy organ toqsanynshy jyldardyń basynda ǵana jasaqtalǵan-dy. Ol Serikbolsyn Ábdildin basqarǵan Joǵarǵy Keńes bolatyn.
Sol kezdegi Keńestiń depýtattary Salyq Zimanov, Asqar Jumadildaev synda shyndyqty shyjǵyryp betke aitatyn depýtattar «halyq qoldap depýtat boldyq» dep aitýyna bolar edi.
Al odan keiingi Parlament sailaýlarynyń bári «fars» bolǵanyn bes jasar bala da biledi emes pe? Sondyqtan Nazarbaev dáýirinde depýtat bolǵandardyń 99 paiyzy «halyq qoldap depýtat bolǵan edik» áńgime aitýyna moraldyq quqyǵy joq.
Álemdik ǵylymda mynadai qyzyq jait bar. Batys elderi 90 jyldary TMD elderinde ǵylymi jumyspen ainalysyp (gýmmanitarlyq sala boiynsha), ǵylymi ataq alǵandardyń kópishligin moiyndamaidy.
Óitkeni olar 90 jyldary Keńes ókimetiniń shekpeninen shyqqan elderde ǵylymi ataq toida taratylatyn jyrtys siiaqty taratylǵanyn jaqsy biledi.
Sol siiaqty Nazarbaev kezeńinde depýtat bolǵandardyń «halyqtyń qoldaýmen depýtat bolǵan edik» degen áńgimesi halyqtyń jirkenishin týǵyzady.
Iá, keiingi Parlamentte Sherhan Murtaza, Amangeldi aitaly syndy birdi-ekili aýzy ýáli depýattar boldy. Osyndai sanaýly adamdar ǵana Nazarbaev dáýirindegi Májiliske óń berip, legitimdi qylǵanyn bilemiz. Al qalǵandarynyń bári qolbala qýyrshaq depýtattar boldy emes pe? Bulai qatty aitqanymyz úshin eks-depýtattar renjimesin.
Endi aldaǵy Májilis sailaýyna qatysyp, depýtattyq mandatqa ie bolǵandardyń «halyqtyń qoldaýymen depýtat boldyq» dep aityp, sailaýshylarynyń kózine tik qaraǵanyn qalaimyz!
