ەكس-دەپۋتتار بولسا «انا تۇرعان بالقان تاۋ، وعان بىزدە بارعان تاۋ» دەگەندەي كىسىمسىپ الەۋمەتتىك جەلىدە جازبا قالدىرۋدا.
دەپۋتاتتى بىلاي قويىپ، سول دەپۋتاتتىڭ شابارماندارى بولعان كومەكشىلەرى دە «دەپۋاتتىڭ كومەكشىسى» دەگەن كۋالىكتەرىن جەلىگە جارىسا جاريالاپ جاتىر. نەتكەن مانساپقورلىق دەسەڭشى.
ال الەۋمەتتىك جەلىدە وتىراتىن ەكس-دەپۋتاتتار «وسىدان تۋرا بالەنباي جىل بۇرىن «حالىقتىڭ قولداۋىمەن» (شىندىعىندا ەلباسى نازاربايەۆتىڭ قولداۋىمەن دەپ ايتپاي ما؟) دەپۋتات بولىپ ەدىك» دەپ الەۋمەتتىك جەلىدە كوسىلىپ پوست جازىپ جاتىر، جازىپ جاتىر.
وسىعان دەيىن دەپۋتاتتىق مانداتقا يە بولعان «حالىق قالاۋلىلارىن» اتامىز نازاربايەۆ «نۇر وتاننىڭ» تىزىمىمەن وتكىزىپ، بيلىككە قارسى «ءماۋ» دەپ ءبىرا اۋىز ءسوز ايتا المايتىن دەپۋتاتتاردى جاساقتاپ كەلگەنىن ءبارىمىز بىلەمىز عوي. سوندىقتان ولاردىڭ «حالىقتىڭ قولداۋىمەن دەپۋتات بولدىق» دەپ ايتاتىنداي ءجونى جوق.
تاۋەلسىز قازاقستاننىڭ تاريحىندا نازاربايەۆتىڭ ايتقانىنا كونبەيتىن، ايداۋىمەن جۇرمەيتىن زاڭ شىعارۋشى ورگان توقسانىنشى جىلداردىڭ باسىندا عانا جاساقتالعان-دى. ول سەرىكبولسىن ءابدىلدين باسقارعان جوعارعى كەڭەس بولاتىن.
سول كەزدەگى كەڭەستىڭ دەپۋتاتتارى سالىق زيمانوۆ، اسقار جۇمادىلدايەۆ سىندا شىندىقتى شىجعىرىپ بەتكە ايتاتىن دەپۋتاتتار «حالىق قولداپ دەپۋتات بولدىق» دەپ ايتۋىنا بولار ەدى.
ال ودان كەيىنگى پارلامەنت سايلاۋلارىنىڭ ءبارى «فارس» بولعانىن بەس جاسار بالا دا بىلەدى ەمەس پە؟ سوندىقتان نازاربايەۆ داۋىرىندە دەپۋتات بولعانداردىڭ 99 پايىزى «حالىق قولداپ دەپۋتات بولعان ەدىك» اڭگىمە ايتۋىنا مورالدىق قۇقىعى جوق.
الەمدىك عىلىمدا مىناداي قىزىق جايت بار. باتىس ەلدەرى 90 جىلدارى تمد ەلدەرىندە عىلىمي جۇمىسپەن اينالىسىپ (گۋممانيتارلىق سالا بويىنشا)، عىلىمي اتاق العانداردىڭ كوپىشلىگىن مويىندامايدى.
ويتكەنى ولار 90 جىلدارى كەڭەس وكىمەتىنىڭ شەكپەنىنەن شىققان ەلدەردە عىلىمي اتاق تويدا تاراتىلاتىن جىرتىس سياقتى تاراتىلعانىن جاقسى بىلەدى.
سول سياقتى نازاربايەۆ كەزەڭىندە دەپۋتات بولعانداردىڭ «حالىقتىڭ قولداۋمەن دەپۋتات بولعان ەدىك» دەگەن اڭگىمەسى حالىقتىڭ جيركەنىشىن تۋعىزادى.
ءيا، كەيىنگى پارلامەنتتە شەرحان مۇرتازا، امانگەلدى ايتالى سىندى بىردى-ەكىلى اۋزى ءۋالى دەپۋاتتار بولدى. وسىنداي ساناۋلى ادامدار عانا نازاربايەۆ داۋىرىندەگى ماجىلىسكە ءوڭ بەرىپ، لەگيتيمدى قىلعانىن بىلەمىز. ال قالعاندارىنىڭ ءبارى قولبالا قۋىرشاق دەپۋتاتتار بولدى ەمەس پە؟ بۇلاي قاتتى ايتقانىمىز ءۇشىن ەكس-دەپۋتاتتار رەنجىمەسىن.
ەندى الداعى ءماجىلىس سايلاۋىنا قاتىسىپ، دەپۋتاتتىق مانداتقا يە بولعانداردىڭ «حالىقتىڭ قولداۋىمەن دەپۋتات بولدىق» دەپ ايتىپ، سايلاۋشىلارىنىڭ كوزىنە تىك قاراعانىن قالايمىز!
