Almatyda WorldSkills Almaty-2025 chempionatynyń jeńimpazdaryn saltanatty túrde marapattaý rásimi ótti, –dep habarlaidy Dalanews.kz
30 negizgi quzyrettilik boiynsha úzdik nátije kórsetken qatysýshylar marapatqa ie boldy. Júlde qory shamamen 10 million teńge: ár nominatsiia boiynsha birinshi orynǵa — 150 000 teńge, ekinshi orynǵa — 100 000 teńge, úshinshi orynǵa — 50 000 teńge tabystaldy.
Endi úzdikterdiń úzdikteri Almaty atynan WorldSkills Kazakhstan-2025 Respýblikalyq chempionatynda (Astana qalasynda) baq synaidy. Al respýblikalyq kezeńde joǵary nátije kórsetkender 2026 jyly Qytai Halyq Respýblikasynyń Shanhai qalasynda ótetin WorldSkills kásibi sheberlik boiynsha halyqaralyq chempionatynda Qazaqstannyń namysyn qorǵaidy.
Buǵan deiin Almaty qalasynyń ákimi Erbolat Dosaev saiysqa qatysýshylarmen kezdesip, olardyń jumystarymen tanysty. Ol stýdent jastardy qoldaýdyń mańyzdylyǵyn atap ótip, suranysqa ie jumysshy mamandyqtar boiynsha arnaiy qosymsha granttar bólinýi múmkin ekenin aitty.
Aita keteiik, qatysýshylardyń jumysyn 500-den astam sarapshy men jumys berýshi baǵalady. Biyl chempionat erekshe mańyzǵa ie boldy, sebebi ol Memleket basshysy jariialaǵan Jumysshy mamandyqtar jyly aiasynda uiymdastyryldy.
WorldSkills Almaty-2025 aimaqtyq chempionaty kásibi jetilýge umtylǵan talantty jastardy biriktirgen jarqyn oqiǵa boldy.
Is-shara stýdentterdiń daiyndyq deńgeiiniń joǵary ekenin kórsetti jáne bilim berý júiesinde tájiribelik daǵdylardyń mańyzdylyǵyn dáleldedi. Jeńimpazdar men júldegerler eńbek naryǵynda ornyn nyǵaityp, bolashaq kásibi mamandarǵa úlgi bolyp keledi.
