Wildberries marketpleisi 2027 jyldyń birinshi toqsanynda Astana men Almatyda jalpy aýmaǵy shamamen 260 myń sharshy metr bolatyn eki iri logistikalyq keshendi iske qosýdy josparlap otyr, dep habarlaidy dalanews.kz.
Bul týraly saýda jáne integratsiia ministri Arman Shaqqaliev málimdedi. Onyń aitýynsha, Astanadaǵy keshenniń aýmaǵy 160 myń sharshy metrdi, al Almatydaǵy logistikalyq ortalyqtyń aýmaǵy 100-103 myń sharshy metrdi quraidy.
Ministr bul jobalar týraly sheshim Reseidegi Wildberries infraqurylymyna jasalǵan shabýyldarǵa deiin qabyldanǵanyn aitty. Onyń sózinshe, qazirgi ýaqytta kompaniia Qazaqstanda shamamen 46 myń sharshy metr qoima alańyn jalǵa alyp otyr. Alaida qosymsha qoima izdeý máselesi boiynsha Saýda ministrligine resmi ótinish túspegen.
Shaqqaliev qoima jaldaý kommertsiialyq kompaniialardyń ózara kelisimimen sheshiletin másele ekenin atap ótti. Sonymen birge ol Qazaqstan úshin otandyq marketpleisterdi damytý mańyzdy ekenin aitty.
Maýsym aiynda Premer-ministr Oljas Bektenovke tanystyrylǵan jobaǵa sáikes, Astanadaǵy Wildberries logistikalyq habynyń qurylysyna 47,7 mlrd teńge investitsiia salynyp, shamamen 6 myń jańa jumys orny ashylady. Úkimet mundai jobalar logistikalyq infraqurylymdy damytýǵa jáne Qazaqstannyń tranzittik áleýetin arttyrýǵa yqpal etedi dep esepteidi.
Ekonomist Almas Chýkinniń pikirinshe, iri halyqaralyq marketpleisterdiń logistikalyq ortalyqtardy Qazaqstanda ornalastyrýy eldiń elektrondyq kommertsiia jáne qoima infraqurylymynyń damýyna oń áser etedi. Onyń aitýynsha, mundai jobalar jańa jumys oryndaryn ashyp qana qoimai, jetkizý merzimin qysqartyp, qazaqstandyq óndirýshilerdiń ónimin halyqaralyq naryqtarǵa shyǵarýǵa qosymsha múmkindik beredi. Sonymen birge ishki logistikanyń sapasy men básekelestigi de artady.
Aita keteiik, shilde aiynyń sońynda Reuters agenttigi Reseidegi birneshe Wildberries qoimasy dron shabýyldarynan zardap shekkennen keiin kompaniia Qazaqstanda qosymsha qoima alańdaryn qarastyryp jatqanyn habarlaǵan bolatyn.
