1 maýsym – Halyqaralyq balalardy qorǵaý kúni QR Premer-ministriniń orynbasary Ermek Kósherbaev jumys saparymen Qyzylorda oblysyna bardy. Issapar aiasynda ol óńir halqynyń ómir súrý sapasyn arttyrýǵa baǵyttalǵan áleýmettik jáne mádeni nysandardyń ashylýyna qatysty.
Sapar barysynda Qyzylorda qalasyndaǵy jańartylǵan Qalalyq mádeniet jáne demalys saiabaǵynyń saltanatty ashylý rásimi ótti. Is-sharaǵa oblys ákimi Nurlybek Nálibaev, Parlament Senaty men Májilisiniń depýtattary, ǵylym jáne mádeniet qairatkerleri, qoǵam belsendileri men qala turǵyndary qatysty.
Saltanatty rásimde Ermek Kósherbaev bul oqiǵanyń mańyzdylyǵyn atap ótip, saiabaqtyń ashylýynyń dál balalar kúnimen tuspa-tus kelýi – Úkimettiń óskeleń urpaqtyń quqyqtaryn qorǵaý jáne olar úshin jaily orta qalyptastyrýǵa baǵyttalǵan saiasatynyń aiqyn kórinisi ekenin aitty.
– Balalar – elimizdiń basty bailyǵy jáne strategiialyq resýrsy. Salynyp jatqan mektepter, saiabaqtar, sporttyq jáne mádeni nysandardyń barlyǵy jas býynnyń qaýipsiz, deni saý jáne úilesimdi ortada ósýine baǵyttalǵan. Memleket basshysy Qasym-Jomart Kemeluly Toqaevtyń tapsyrmasyna sáikes elimizde «Taza Qazaqstan» bastamasy júzege asyrylýda. Bul – jai ǵana ekologiialyq aktsiia emes, bul – azamattardyń ómir sapasyn jańa deńgeige kóteretin júieli ózgeris. Qalanyń sáýletti kelbetin jańartqan jańa saiabaq sonyń naqty dáleli, – dedi Ermek Kósherbaev.
Sondai-aq, sapar aiasynda Ermek Kósherbaev elimizdiń 17 óńirinen kelgen oqýshylarǵa arnalǵan fizika-matematika baǵytyndaǵy jańa litsei-internattyń ashylýy ótti. Bul zamanaýi bilim ordasy – talantty jastardyń ǵylymi áleýetin damytýǵa baǵyttalǵan mańyzdy ortalyq bolmaq.
– Sapaly bilim – tabystyń kepili ári ekonomikalyq ósýdiń basty negizi. Bizdiń maqsatymyz – jan-jaqty damyǵan, ǵylym men tehnologiiany ilgeriletetin jas býyndy tárbieleý. Qyzylorda óńirinde jastardyń qabiletin ashýǵa barlyq jaǵdai jasalyp jatyr. Jańa litsei – sonyń jarqyn mysaly, – dep atap ótti Premer-ministrdiń orynbasary.
Atalǵan áleýmettik nysandar elimiz úshin tarihi máni zor – «Qazaq» ataýynyń qaitarylýy men Qyzylordanyń Alash astanasy atanýynyń 100 jyldyǵyna arnalǵan merekelik sharalardyń bir bóligi retinde ashyldy.
Jumys saparynyń qorytyndysy boiynsha Ermek Kósherbaev Qyzylorda oblysynyń áleýmettik-ekonomikalyq damý qarqynyna oń baǵa berip, óńirdiń memlekettik saiasattyń negizgi baǵyttary boiynsha turaqty jáne nátijeli ósim kórsetip otyrǵanyn atap ótti.
Úkimet halyqtyń ómir súrý sapasyn arttyrý men infraqurylymdy damytýǵa erekshe nazar aýdaryp keledi. Bilim berý, demalys jáne jeke damý baǵyttarynda júzege asyrylyp jatqan jobalar – qoǵamda belsendi, saýatty ári deni saý urpaqty qalyptastyrýǵa negiz bolady. Memlekettik organdar, biznes jáne jergilikti qaýymdastyqtardyń birlesken kúsh-jigeriniń nátijesinde Qyzylorda oblysy joǵary qarqynmen damyp keledi. Mundai bastamalar elimizdiń ornyqty damýy men jarqyn bolashaǵynyń berik irgetasy bolmaq.
