Qarjy naryǵyn retteý jáne damytý agenttigi resmi túrde Viacheslav Kimge "First Heartland Jusan Bank" AQ-tyń iri qatysýshysy mártebesin ielenýge kelisim berdi. Iaǵni, Kim Jusan Bank-ti satyp ala alatyn boldy, dep habarlaidy Dalanews.kz.
"Ótinishti qaraý "Qazaqstan Respýblikasyndaǵy bankter jáne bank qyzmeti týraly" Zańnyń 17-1-babynyń talaptaryna sáikes júzege asyryldy. Qoldanystaǵy zańnamaǵa sáikes jeke nemese zańdy tulǵanyń iri qatysýshy nemese bank holdingi mártebesin alýyna ýákiletti organnyń aldyn ala jazbasha kelisimi bolǵan kezde ǵana jol beriledi", delingen QNRDA habarlamasynda.
Aita ketsek,Viacheslav Kim 2025 jyldyń aqpan aiynyń basynda Ǵalymjan Esenovtan Jusan Bank aktsiialarynyń 97,5% -yn satyp alý úshin agenttikke ótinim bergen bolatyn. "Bul mámileniń Kaspi.kz kompaniiasyna qatysy joq", - dedi sol kezde kásipker. Alaida, bul protsess uzaqqa sozyldy. Sońǵy jariialanǵan málimetterge sáikes, Ǵalymjan Esenov (2025 jyly biznes 560 mln bailyǵymen eń bai biznesmender reitinginde 19-oryn) tikelei Jusan Bank aktsiialarynyń 19,67%-yna jáne "First Heartland Securities" AQ arqyly 78,11%-yna ielik etedi.
Bir qyzyǵy, 28 mamyrda Jusan Bank aktsioneriniń aýysýyn kútpesten óz ataýlaryn Alatau City Bank dep ózgertetinderin jariialady jáne jańa logotipti de tanystyrdy.
"Rebrending banktiń strategiiasynyń, ambitsiiasy men qarjy institýtyn odan ári damytýǵa basymdyq beretininiń kórinisi bolyp tabylady", - delingen bank baspasóz qyzmeti habarlamasynda.
Banktiń jańa ataýy Almaty mańynan qurylyp jatqan jańa ekonomikalyq aimaqpen bailanystyrylady. Soǵan qaraǵanda Viacheslav Kim osy baǵytqa da qomaqty investitsiia jumsamaq.
"First Heartland Jusan Bank" AQ Qazaqstan Respýblikasynyń ekinshi deńgeidegi iri bankteriniń qataryna kiredi. 2025 jylǵy 1 mamyrdaǵy jaǵdai boiynsha Banktiń aktivteri 3 195 mlrd teńgeni, menshikti kapitaly 900 mlrd teńgeni quraidy. Bank kapitaly men ótimdiliktiń jetkiliktiligi normativterin qosa alǵanda, belgilengen prýdentsiialyq normativterdi saqtaidy. Aktivter kólemi boiynsha Bank 6-shy orynda, nesie portfeliniń mólsheri boiynsha — eldiń bank júiesinde 8-shi orynda.
Sonymen birge V.K. Kim "Kaspi Bank" AQ-tyń janama iri qatysýshysy bolyp tabylady, atalǵan bank Qazaqstan Respýblikasynyń bank sektorynda jetekshi oryn alady, onyń ishinde aktivter men nesie portfeliniń mólsheri boiynsha 2-shi orynda.
