Qazaq Air satylady degeli bir jyldyń júzi boldy. Biraq bul rette, keri sheginý bolmasa, (bolady degen kelisim eki ret bolmai qaldy) alǵa jyljý joq. Kúni keshe Qazaq Air-dyń vetnamdyq SOVICO Group-ke satý protsesi Taiaý Shyǵystaǵy jaǵdaiǵa bailanysty kesheýildep jatqany týraly aqparat tarady. Bul - resmi málimet. Al beiresmi habarlarda ne aitylyp jatyr? Osy negizde qor naryǵynyń mamany Daniiar Temirbaevtyń jelide jariialanǵan myna bir jazbasyn Dalanews.kz aýdaryp, ózderińizge sol kúiinde usynýdy jón kórip otyr.
"Ngýen Thi Fyong Thao (Nguyen Thi Phuong Thao) - Vetnamdaǵy alǵashqy milliarder áiel. Osy esimdi este durystap saqtap alyńyzdar. Ol alǵashqy millionyn ($) Reseide stýdent bolyp júrgende tapqan. Aladorba arqalap, saýda jasap degendei. Onyń Qazaqstanǵa ne qatysy bar dersizder?
Ngýen hanym - vetnamdyq Vietjet Air loýkosteriniń negizin qalaýshy. Osy Vietjet-pen bailanysty qurylym (SOVICO) "Samuryq-Qazynadan" problemalyq enshilesi - QAZAQ AIR-dy satyp almaqshy. Taraptar mamyr aiynda kelisim sharttaryna qol qoiyp tastaǵan. Biraq osy ýaqytqa deiin mámile sońyna deiin jetkizilgen joq.
QAMS QazTrading Telegram arnasynyń málimetinshe, Samuryq-Qazynada "QAZAQ AIR jáne tranzaktsiialyq qujattama jobalaryn iske asyrý sharttary boiynsha" sońǵy kelissózder júrgizilip jatqan kórinedi. Jalpy, jospar boiynsha jyl sońyna deiin bul mámileni aiaqtaý kerek delinedi. Biraq qai jyldyń sońynda ekeni, ol jaǵy áli belgisiz).
Buǵan deiin Vietjet-tiń Qazaqstanda 50-ge jýyq Boeing/Airbus bortyn qatarǵa qosý týraly ambitsiialyq maqsaty bar ekeni aitylǵan. Eger, shynymen de solai bolsa (buǵan sene alar emespin), VietJet Air Astana-nyń naryqtaǵy myqty básekelesi bolyp shyǵa kelmek. VietJet - jańa aviakompaniia, Air Astana-dan da jas, 2011 jyldan bastap jumys istei bastady. Búgingi tańda ol 100 million halqy bar Vetnamnyń áýe tasymaly naryǵynyń 40%-yn qamtidy.
VietJet marketingi de erekshe, jarnamalarynda erotika elementterin jii qoldanady...", delingen jazbada.
Aita ketsek, 100% "Samuryq-Qazyna"memlekettik qoryna tiesili Qazaq Air 2015 jyly qurylǵan, Qazaqstannyń áýe naryǵynyń shamamen 7% -yn qamtidy. Áýe floty Bombardier dhc-8-Q400NG markaly bes ushaqtan turady.
Sovico Group - energetika, qurylys, bank, qarjy, sondai-aq aviatsiia salasyn da qamtyp jatqan Vetnamdaǵy ártaraptandyrylǵan eń iri konglomerattardyń biri. Al Ngýen Thi Fyong Thaonyń ózine kelsek, ol Aziia, Batys jáne Soltústik Amerikadaǵy el ekonomikasyn túbegeili ózgertken 300 adam tizimine enetin óte yqpaldy biznesmen áiel.
