Qazaq Air ساتىلادى دەگەلى ءبىر جىلدىڭ ءجۇزى بولدى. ءبىراق بۇل رەتتە، كەرى شەگىنۋ بولماسا، (بولادى دەگەن كەلىسىم ەكى رەت بولماي قالدى) العا جىلجۋ جوق. كۇنى كەشە Qazaq Air-دىڭ ۆەتنامدىق SOVICO Group-كە ساتۋ پروسەسى تاياۋ شىعىستاعى جاعدايعا بايلانىستى كەشەۋىلدەپ جاتقانى تۋرالى اقپارات تارادى. بۇل - رەسمي مالىمەت. ال بەيرەسمي حابارلاردا نە ايتىلىپ جاتىر؟ وسى نەگىزدە قور نارىعىنىڭ مامانى دانيار تەمىربايەۆتىڭ جەلىدە جاريالانعان مىنا ءبىر جازباسىن Dalanews.kz اۋدارىپ، وزدەرىڭىزگە سول كۇيىندە ۇسىنۋدى ءجون كورىپ وتىر.
"نگۋەن تحي فىونگ تحاو (Nguyen Thi Phuong Thao) - ۆەتنامداعى العاشقى ميللياردەر ايەل. وسى ەسىمدى ەستە دۇرىستاپ ساقتاپ الىڭىزدار. ول العاشقى ميلليونىن ($) رەسەيدە ستۋدەنت بولىپ جۇرگەندە تاپقان. الادوربا ارقالاپ، ساۋدا جاساپ دەگەندەي. ونىڭ قازاقستانعا نە قاتىسى بار دەرسىزدەر؟
نگۋەن حانىم - ۆەتنامدىق Vietjet Air لوۋكوستەرىنىڭ نەگىزىن قالاۋشى. وسى Vietjet-پەن بايلانىستى قۇرىلىم (SOVICO) "سامۇرىق-قازىنادان" پروبلەمالىق ەنشىلەسى - QAZAQ AIR-دى ساتىپ الماقشى. تاراپتار مامىر ايىندا كەلىسىم شارتتارىنا قول قويىپ تاستاعان. ءبىراق وسى ۋاقىتقا دەيىن مامىلە سوڭىنا دەيىن جەتكىزىلگەن جوق.
سامۇرىق-قازىناداعى QAMS QazTrading Telegram ارناسىنىڭ مالىمەتىنشە، "QAZAQ AIR جانە ترانزاكسيالىق قۇجاتتاما جوبالارىن ىسكە اسىرۋ شارتتارى بويىنشا" سوڭعى كەلىسسوزدەر جۇرگىزىلىپ جاتقان كورىنەدى. جالپى، جوسپار بويىنشا جىل سوڭىنا دەيىن بۇل مامىلەنى اياقتاۋ كەرەك دەلىنەدى. ءبىراق قاي جىلدىڭ سوڭىندا ەكەنى دەڭىز، ول جاعى ءالى بەلگىسىز).
بۇعان دەيىن Vietjet-ءتىڭ قازاقستاندا 50-گە جۋىق Boeing/Airbus بورتىن قاتارعا قوسۋ تۋرالى امبيسيالىق ماقساتى بار ەكەنى ايتىلعان. ەگەر، شىنىمەن دە سولاي بولسا (بۇعان سەنە الار ەمەسپىن)، VietJet Air Astana-نىڭ نارىقتاعى مىقتى باسەكەلەسءى بولىپ شىعا كەلمەك. VietJet - جاڭا اۆياكومپانيا، Air Astana-دان دا جاس، 2011 جىلدان باستاپ جۇمىس ىستەي باستادى. بۇگىنگى تاڭدا ول 100 ميلليون حالقى بار ۆەتنامنىڭ اۋە تاسىمالى نارىعىنىڭ 40%-ىن قامتيدى.
VietJet ماركەتينگى دە ەرەكشە، جارنامالارىندا ەروتيكا ەلەمەنتتەرىن ءجيى قولدانادى..."، دەلىنگەن جازبادا.
ايتا كەتسەك، 100% "سامۇرىق-قازىنا"مەملەكەتتىك قورىنا تيەسىلى Qazaq Air 2015 جىلى قۇرىلعان، قازاقستاننىڭ اۋە نارىعىنىڭ شامامەن 7% -ىن قامتيدى. اۋە فلوتى Bombardier dhc-8-Q400NG ماركالى بەس ۇشاقتان تۇرادى.
Sovico Group - ەنەرگەتيكا، قۇرىلىس، بانك، قارجى، سونداي-اق اۆياسيا سالاسىن دا قامتىپ جاتقان ۆەتنامداعى ءارتاراپتاندىرىلعان ەڭ ءىرى كونگلومەراتتاردىڭ ءبىرى. ال نگۋەن تحي فىونگ تحاونىڭ وزىنە كەلسەك، ول ازيا، باتىس جانە سولتۇستىك امەريكاداعى ەل ەكونوميكاسىن تۇبەگەيلى وزگەرتكەن 300 ادام تىزىمىنە ەنەتىن وتە ىقپالدى بيزنەسمەن ايەل.
