Maýsym aiynda Venesýelada bolǵan joiqyn jer silkinisterinen kelgen tikelei shyǵyndy Dúniejúzilik bank 19,6 mlrd dollar (17,2 mlrd eýro) kóleminde baǵalady, dep jazady Euronews, dep habarlaidy dalanews.kz.
Baiandamaǵa sáikes, jalpy shyǵynnyń 47%-y turǵyn úi qoryna tiesili. Infraqurylym nysandarynyń búlinýi – 27%, al turǵyn emes ǵimarattardyń úlesi – 26%.
Eń kóp zardap shekken aimaqtar – La-Gýaira shtaty men Elordalyq okrýg. Eldegi barlyq qiraýdyń shamamen jartysy osy óńirlerde tirkelgen.
Sarapshylardyń aitýynsha, qalpyna keltirý jumystarynyń qarqyny el ekonomikasyna tikelei áser etedi. Eger qosymsha qarjylandyrý tartylmasa, qaita qalpyna keltirý jumystary 10 jyldan astam ýaqytqa sozylýy múmkin. Bul jaǵdaida qarjynyń edáýir bóligin basqa memlekettik jobalardan qaita bólýge týra keledi.
Dúniejúzilik banktiń pikirinshe, qalpyna keltirý jumystaryn jedeldetý jáne memlekettik ári jeke investitsiialardy kóbeitý tabiǵi apattyń ekonomikalyq jáne áleýmettik saldaryn jeńildetýge múmkindik beredi.
Baiandamada halyqtyń osal toptaryna da erekshe nazar aýdarylǵan. Eń kóp zardap shekken jeti shtatta shamamen 11,5 mln adam turady, bul Venesýela halqynyń 40%-yna jýyq. Sondyqtan qalpyna keltirý kezeńinde bul óńirlerdi eń aldymen úzdiksiz aýyzsý jáne elektr energiiasymen qamtamasyz etý qajet ekeni aitylǵan.
Eske salaiyq, 24 maýsymda Venesýelada birneshe qýatty jer silkinisi boldy. Sońǵy málimetterge sáikes, qaza tapqandar sany 5,3 myń adamnan asty.
