AQSh pen Qytai arasynda ótken joǵary deńgeidegi kelissózder nátijeli boldy. Taraptar saýda-ekonomikalyq yntymaqtastyq pen jasandy intellekt (JI) salasyndaǵy ózara is-qimyl máselelerin talqylady, dep habarlaidy dalanews.kz.
AQSh-tyń Qarjy ministri Skott Bessenttiń aitýynsha, kelissózder barysynda jasandy intellekt salasyndaǵy yntymaqtastyqty damytýǵa baǵyttalǵan jańa tetik qurý máselesi qaralǵan.
«Bul bastama “AQSh–Qytai JI dialogy” dep atalady. AQSh eki el arasynda ózara habardar etý mehanizmin engizýdi usyndy. Sonymen qatar biz maqsattar men yqtimal qaýip-qaterlerge qatysty ortaq kózqaras qalyptastyrýdy kózdeimiz», – dedi Bessent.
Qytai men AQSh arasyndaǵy saýda-ekonomikalyq kelissózder Niý-Iork qalasynda ótti. Qytai Memlekettik keńesiniń vitse-premeri He Lifen tańerteń JPMorgan Chase kompaniiasynyń Niý-Iorktegi shtab-páterine kelip, onda Skott Bessentpen kezdesti.
Kezdesý osy aptaǵa josparlanǵan eki el kóshbasshylarynyń sammiti qarsańynda uiymdastyryldy. Bloomberg agenttiginiń málimetinshe, AQSh prezidentiniń biyl mamyr aiynda Beijińge jasaǵan sapary aldynda da Bessent pen He Lifen kelissóz júrgizgen. Ol kezdesý Ońtústik Koreianyń Seýl qalasynda ótken bolatyn.
Sarapshylardyń pikirinshe, Vashington men Beijiń arasyndaǵy dialogtyń jalǵasýy álemdik ekonomika men tehnologiialyq salalardaǵy turaqtylyq úshin mańyzdy qadamdardyń biri sanalady.
