Bul týraly Habar 24 habarlaidy.
Sońǵy ailarda Ásiia ájei tósek tartyp qaldy. 101 jastaǵy keiýanaǵa úi ishinde júrip-turýdyń ózi qiynǵa soǵyp barady. Týǵan elge degen saǵynysh ta, ózegin órteidi. «Qazaqstannan jýrnalister keledi» degen habardy estigen ol tańǵy 6-dan turyp, jerlesterimen kezdesýge daiyndalypty. Qyzdary 80 jastaǵy Rona men 70 jastaǵy Ámina analarynyń erekshe qýanǵanyn aitady.
«Jandarym meniń, keldińder me meniń otanymnan? Men sondai aýyryp, saǵynyp júr edim. Alystan keldińder ǵoi. Men Qazaqstandy saǵynyp júrmin, jii jylap alamyn», – deidi Ásiia Sardarbek.
Ótken júzjyldyqtaǵy aýyr synaqtar men zulmat oqiǵalar. Ásiia ájei taǵdyrynyń tym aýyr bolǵany sonshalyq, odan tipti tragediialyq janrdaǵy kitap jazýǵa bolar edi.
«Jambyl oblysyndaǵy Shý aýylyna áskeriler kelgende meniń jasym 10-da edi. Turǵyndardyń keibirin birden atyp tastady. Al basqalardyń dúnieleri men maldaryn tartyp aldy. Bizde qansha túie, iri qara, qoilar bar, sonyń barlyǵyn jazyp aldy. Sosyn bizdiń qolymyzǵa mór qoidy. Ol atyp tastaý degendi bildiredi eken. Ony bilgen soń otbasymyzben birge qashyp kettik. Meni Hadisha apaiym arqasyna salyp aldy. Osylaisha uzaq joldy bastadyq», – deidi Ásiia Sardarbek.
Sodan soń Sardarbek otbasy kishkentai balalarymen birge taýdan asyp, Ámýdariia ózenine ótken. Talai tosqaýyldy eńsergen olar baǵyttarynan jańylyspai, Aýǵanstanǵa jetipti.
Jyldar ótken soń boijetken Ásiiaǵa Aýǵanstan basqarýshysynyń uly ǵashyq bolyp qalady. Jastaiynan turmysqa shyǵyp, bedeldi otbasyna kelin bolyp túsedi.
«Olar óte jaqsy adamdar boldy. Maǵan múldem úi jinaý, kir jýý, tamaq daiyndaý syndy tirlikterdi istetpeitin. Ózimniń jeke qyzmetshim boldy», – deidi Ásiia Sardarbek.
Ásiia ájei qaiyn atasyn erekshe qurmetpen eske alady. «Kelinim týǵan tilin umytpasyn» degen oimen qyzmetshilerdi qazaq ultynan aldyrtypty. Keiin Ásiia Sardarbektiń kúieýi Aýǵanstannyń qorǵanys ministri atanady. Al 1979 jyly elge Keńes áskerileri kelip, olar basqa elge qashýǵa májbúr bolady. Bul joly Ásiia ájei Túrkiiaǵa, Germaniiaǵa, sodan soń AQSh-qa qonys aýdarady. Sońǵy 40 jylyn osy Vashington qalasynda ótkizgen. Keiýananyń qyzdary biyl Qazaqstanǵa kelip ketipti.
«Bul óte tamasha sapar boldy. Az ǵana ýaqyt ishinde Prezidentterińiz biraz tirlikti tiianaqtapty. Ádemi úiler, tańǵajaiyp Astana. Prezident Nursultan Nazarbaevqa sálemimizdi joldap, ózimniń rizashylyǵymdy jetkizgim keledi. Men anamnyń týǵan jerin jaqsy kóremin. Sizderdiń elderińizge tabys, myqty densaýlyq tileimi», – deidi Ásiia ájeidiń qyzy Ámina Amiri.
Ásiia ájei qyzdarynyń Qazaqstanǵa baryp qaitqanyna qýanyshty. 90 jyl boiy týǵan jerinen jyraqta júrse de, qazaq tilin umytpai, salt-dástúrin berik saqtap keledi. Aq jaýlyqty ananyń endigi armany – Qazaqstanǵa, tarihi Otanyna oralý.
