بۇل تۋرالى حابار 24 حابارلايدى.
سوڭعى ايلاردا ءاسيا اجەي توسەك تارتىپ قالدى. 101 جاستاعى كەيۋاناعا ءۇي ىشىندە ءجۇرىپ-تۇرۋدىڭ ءوزى قيىنعا سوعىپ بارادى. تۋعان ەلگە دەگەن ساعىنىش تا، وزەگىن ورتەيدى. «قازاقستاننان جۋرناليستەر كەلەدى» دەگەن حاباردى ەستىگەن ول تاڭعى 6-دان تۇرىپ، جەرلەستەرىمەن كەزدەسۋگە دايىندالىپتى. قىزدارى 80 جاستاعى رونا مەن 70 جاستاعى ءامينا انالارىنىڭ ەرەكشە قۋانعانىن ايتادى.
«جاندارىم مەنىڭ، كەلدىڭدەر مە مەنىڭ وتانىمنان؟ مەن سونداي اۋىرىپ، ساعىنىپ ءجۇر ەدىم. الىستان كەلدىڭدەر عوي. مەن قازاقستاندى ساعىنىپ ءجۇرمىن، ءجيى جىلاپ الامىن»، – دەيدى ءاسيا سارداربەك.
وتكەن ءجۇزجىلدىقتاعى اۋىر سىناقتار مەن زۇلمات وقيعالار. ءاسيا اجەي تاعدىرىنىڭ تىم اۋىر بولعانى سونشالىق، ودان ءتىپتى تراگەديالىق جانرداعى كىتاپ جازۋعا بولار ەدى.
«جامبىل وبلىسىنداعى شۋ اۋىلىنا اسكەريلەر كەلگەندە مەنىڭ جاسىم 10-دا ەدى. تۇرعىنداردىڭ كەيبىرىن بىردەن اتىپ تاستادى. ال باسقالاردىڭ دۇنيەلەرى مەن مالدارىن تارتىپ الدى. بىزدە قانشا تۇيە، ءىرى قارا، قويلار بار، سونىڭ بارلىعىن جازىپ الدى. سوسىن ءبىزدىڭ قولىمىزعا ءمور قويدى. ول اتىپ تاستاۋ دەگەندى بىلدىرەدى ەكەن. ونى بىلگەن سوڭ وتباسىمىزبەن بىرگە قاشىپ كەتتىك. مەنى حاديشا اپايىم ارقاسىنا سالىپ الدى. وسىلايشا ۇزاق جولدى باستادىق»، – دەيدى ءاسيا سارداربەك.
سودان سوڭ سارداربەك وتباسى كىشكەنتاي بالالارىمەن بىرگە تاۋدان اسىپ، ءامۋداريا وزەنىنە وتكەن. تالاي توسقاۋىلدى ەڭسەرگەن ولار باعىتتارىنان جاڭىلىسپاي، اۋعانستانعا جەتىپتى.
جىلدار وتكەن سوڭ بويجەتكەن ءاسياعا اۋعانستان باسقارۋشىسىنىڭ ۇلى عاشىق بولىپ قالادى. جاستايىنان تۇرمىسقا شىعىپ، بەدەلدى وتباسىنا كەلىن بولىپ تۇسەدى.
«ولار وتە جاقسى ادامدار بولدى. ماعان مۇلدەم ءۇي جيناۋ، كىر جۋۋ، تاماق دايىنداۋ سىندى تىرلىكتەردى ىستەتپەيتىن. ءوزىمنىڭ جەكە قىزمەتشىم بولدى»، – دەيدى ءاسيا سارداربەك.
ءاسيا اجەي قايىن اتاسىن ەرەكشە قۇرمەتپەن ەسكە الادى. «كەلىنىم تۋعان ءتىلىن ۇمىتپاسىن» دەگەن ويمەن قىزمەتشىلەردى قازاق ۇلتىنان الدىرتىپتى. كەيىن ءاسيا سارداربەكتىڭ كۇيەۋى اۋعانستاننىڭ قورعانىس ءمينيسترى اتانادى. ال 1979 جىلى ەلگە كەڭەس اسكەريلەرى كەلىپ، ولار باسقا ەلگە قاشۋعا ءماجبۇر بولادى. بۇل جولى ءاسيا اجەي تۇركياعا، گەرمانياعا، سودان سوڭ اقش-قا قونىس اۋدارادى. سوڭعى 40 جىلىن وسى ۆاشينگتون قالاسىندا وتكىزگەن. كەيۋانانىڭ قىزدارى بيىل قازاقستانعا كەلىپ كەتىپتى.
«بۇل وتە تاماشا ساپار بولدى. از عانا ۋاقىت ىشىندە پرەزيدەنتتەرىڭىز ءبىراز تىرلىكتى تياناقتاپتى. ادەمى ۇيلەر، تاڭعاجايىپ استانا. پرەزيدەنت نۇرسۇلتان نازاربايەۆقا سالەمىمىزدى جولداپ، ءوزىمنىڭ ريزاشىلىعىمدى جەتكىزگىم كەلەدى. مەن انامنىڭ تۋعان جەرىن جاقسى كورەمىن. سىزدەردىڭ ەلدەرىڭىزگە تابىس، مىقتى دەنساۋلىق تىلەيمى»، – دەيدى ءاسيا اجەيدىڭ قىزى ءامينا اميري.
ءاسيا اجەي قىزدارىنىڭ قازاقستانعا بارىپ قايتقانىنا قۋانىشتى. 90 جىل بويى تۋعان جەرىنەن جىراقتا جۇرسە دە، قازاق ءتىلىن ۇمىتپاي، ءسالت-داستۇرىن بەرىك ساقتاپ كەلەدى. اق جاۋلىقتى انانىڭ ەندىگى ارمانى – قازاقستانعا، تاريحي وتانىنا ورالۋ.
