Búgin Jetisý oblysynda «Jetisý» voleibol klýbynyń 25 jyldyǵyna orai jáne erler men áielder komandalarynyń 2025–2026 jylǵy maýsymda joǵary nátijeler kórsetýine bailanysty voleibolshylarǵa qurmet kórsetildi. Is-sharaǵa kelgen jas sportshylarǵa klýb oiynshylarynyń qoltańbasy qoiylǵan 1 myńdai dop taratylyp, master klass uiymdastyryldy. Klýb múshelerin oblys ákimi Beibit Isabaev quttyqtap, marapattar tapsyrdy, dep habarlaidy dalanews.kz.
Taldyqorǵandaǵy «Jastar» Sport saraiynda ótken saltanatty sharaǵa voleiboldan erler men áielder komandalary jáne qosalqy quramdary, sport ardagerleri, túrli halyqaralyq týrnirlerdiń jeńimpazdary, jas sportshylar – jalpy sany 1500 adam qatysty.
Sportshylardy mereili jylmen jáne jeńisterimen oblys ákimi Beibit Isabaev quttyqtady. Ol «Jetisý» áielder komandasynyń osy maýsymda onynshy márte chempion bolǵanyn, al erler komandasynyń el chempionatyn, Kýbogy men Sýperkobogyn utyp alǵanyn tilge tiek etip, barlyq klýb múshelerine alǵysyn jetkizdi. Sol siiaqty bolashaq sportshylardy tárbieleý isine de nazar aýdardy.
- Biylǵy kezdesýdiń mán-maǵynasy tipti tereń. Sebebi osy jyly kásibi «Jetisý» voleibol klýbynyń qurylǵanyna 25 jyl tolyp otyr. Bul kezeń jarqyn jeńisterge toly boldy jáne óz isin adal atqaratyn myqty tulǵalardy qalyptastyrdy. Osy ýaqyt ishinde «Jetisý» klýby óńirimizdiń sporttyq maqtanyshyna, chempiondar mektebine jáne júieli damýdyń aiqyn úlgisine ainaldy. Biz tek komandalar daiyndap qana qoimaimyz, biz jyl saiyn básekege qabiletti sportshylardy tárbieleitin júie qalyptastyryp otyrmyz. Biz aldaǵy ýaqytta da sportshylardy daiyndaýǵa qolaily jaǵdai jasap, infraqurylymdy jańǵyrtyp, kásibi klýbtar men balalar men jasóspirimder sportyn qoldaýdy jalǵastyramyz. Bizdiń maqsatymyz — bolashaq chempiondardyń týǵan jerinde ósip-ónýi, - degen B. Isabaev munan soń marapattaý rásimin atqardy.
Atap aitqanda, «Jetisý» voleibol klýbynyń bas jattyqtyrýshysy Marat Adryshevke «Qurmet» ordeni, «Jetisý» erler komandasynyń oiynshysy Aibek Jaqsylyqovqa, áielder komandasynyń oiynshysy Valeriia Iakýtinaǵa Prezidenttiń Alǵysy jáne tósbelgisi, sol siiaqty klýbtyń birqatar múshelerine Prezidenttiń Alǵysy, oblys ákiminiń Alǵys haty berildi.
Marapattalýshylar atynan sóz alǵan klýbtyń bas jattyqtyrýshysy Marat Adryshev:
- Bizge berilgen marapat úshin shyn júrekten alǵys aitamyn. Bul biz úshin úlken mártebe jáne bolashaqta jańa jeńisterge jetýge qýat beredi. Maǵan senim artqan basshylyqqa, qoldaý kórsetken ujymǵa raqmet. Bul – bizdiń ortaq jeńisimiz, - dedi ol.
Osy basqosýda jas sportshylar klýb jattyqtyrýshylary men oiynshylaryna ózderin qyzyqtyrǵan suraqtaryn qoiyp, ózara oi almasty.
Kezdesýge kelgen klýb múshelerin sózge tarttyq.
- Jasóspirim kezimnen osy «Jastar» Sport saraiynda ártúrli jas sanatynda voleiboldan jattyǵyp óstim. 2016 jyldan «Jetisý» voleibol quramasynyń sapynda oiyshy boldym. Keiin mansabymdy jattyqtyrýshy retinde jalǵastyrdym. Qazir ulttyq quramada assitent-statistikpin. Búgingi kúni Jetisý voleiboly jaqsy qarqynmen damyp keledi. Osy maýsymda el chempionatyn, Kýbogyn, Sýperkýbogyn uttyq. Bul erler komandasynyń tarihynda bolmaǵan. Bul jeńiske biz jinalǵan tájiribeniń, jasalǵan qolaily jaǵdaidyń jáne tynymsyz jattyǵýdyń arqasynda jettik, - dedi «Jetisý» erler komandasynyń analitik-statistigi Marlen Aitjanov.
«Jastar» Sport saraiynda kelgen oqýshylardyń biri Balnur Erlanqyzy búgingi sharanyń mán-mańyzy týraly óz pikirin bildirdi:
- Taldyqorǵan qalasyndaǵy № 18 mekteptiń 8 «á» synybynda oqimyn. Voleibol klýbyndaǵy úiirmege qatysyp júrgenime 5 jyl boldy. Búginge deiin birneshe ret 2012-2013 jylǵy jasóspirimder arasyndaǵy jarystardan júldeli oryndar aldyq. «Jetisý» kásibi voleibol komandalarynyń chempionattaǵy oiyndaryn saittardan, telearnadan tamashalap otyrdyq. Olar jeńiske jetkende biz de qýandyq. Búgingi kezdesýge asyǵa keldim, qoltańba qoiylǵan dop aldym. Mundai júzdesýler bizge úlken motivatsiia beredi. Bolashaqta osy aǵa-ápkelerimiz sekildi myqty sportshy bolǵym keledi, - deidi jas voleibolshy B. Erlanqyzy.
Kezdesý sońy D. Raqyshev atyndaǵy oblystyq filarmoniia ánshileriniń merekelik kontsertimen túiindeldi.
Eske salsaq, 2025–2026 jylǵy maýsymda «Jetisý» voleiboldan áielder komandasy el chempinatynyń onynshy márte chempiony atandy. Sol siiaqty jýyrda Tailandta ótken Aziia klýbtyq chempionatynda qola júldege ie boldy. Al voleiboldan erler komandasy el chempiony atandy, oǵan qosa Kýbokty jáne Sýperkýbokty jeńip aldy.
