Qazaqstan 2026 jyly 51,9 mlrd dollar kólemindegi syrtqy qaryzyn óteýi tiis, dep habarlaidy dalanews.kz.
Bul soma eldiń jalpy syrtqy boryshynyń shamamen úshten birine teń. Salystyrý úshin, atalǵan kórsetkish bir jyldyq respýblikalyq biýdjet kóleminen de asyp túsedi, dep jazady Tizgin.kz.
Qazaqstan Ulttyq banki málimetine sáikes, 2026 jyldyń basynda eldiń jalpy syrtqy qaryzy 181,8 mlrd dollardy quraǵan. Onyń ishinde 24,4 mlrd dollary firmaaralyq bereshekke, 19,2 mlrd dollary ózge sektorlarǵa tiesili. Bankterdiń tólemi – 6,4 mlrd dollar, memlekettik sektor – 1,6 mlrd dollar, al Ulttyq bank – 0,36 mlrd dollar kóleminde mindetteme alǵan. Qalǵan 59,3 mlrd dollar taýarlar men qyzmetter arqyly óteledi.
Qaryz qurylymynda burynǵydai negizgi úles jeke sektorǵa tiesili. Memlekettik borysh kólemi 16 mlrd dollardy, bankterdiń mindettemeleri 18,3 mlrd dollardy quraidy. Al firmaaralyq bereshek 89,9 mlrd dollarǵa jetken.
Qazaqstannyń basty kreditorlary qatarynda Niderland, Ulybritaniia, Resei, Qytai, Frantsiia jáne AQSh bar.
AQSh valiýtasymen alǵan qaryz 2016 jyly 131,1 mlrd dollar bolsa, 2026 jyly 119,3 mlrd dollarǵa deiin azaiǵan. Eýroqaryz kerisinshe 2,5 mlrd dollardan 5,6 mlrd dollarǵa deiin ulǵaiǵan. Resei rýblimen alǵan bereshek 460 mln dollardan 6,6 mlrd dollarǵa deiin kóbeiip, shamamen 14 ese ósken. Qytai iýanimen tartylǵan qaryz 55 mln dollardan 6,3 mlrd dollarǵa deiin ósip, 115 ese ulǵaiǵan. Al teńgemen tóleitin mindettemeler 4,4 mlrd dollardan 12,5 mlrd dollarǵa deiin kóbeigen.
