Búgin Úkimet otyrysynda QR Ishki ister ministri Qalmuhanbet Qasymov Almaty oblysynda bolǵan jantúrshigerlik qaiǵyly oqiǵa týraly baiandap berdi dep habarlady Zakon.kz.
— 20-qyrkúiekte bizge Almatyǵa úsh aǵaiyndy azamattyń mal satýǵa ketip, qaityp oralmaǵandyǵy týraly shaǵym kelip tústi. Olar eki kólikpen 41 bas maldy Almaty oblysyna satý úshin alyp shyqqan. 21-qyrkúiekte birinshi, 23-qyrkúiekte ekinshi kólikti taptyq. Keiinnen bul kóliktiń batpaqqa batyp qalyp, jergilikti turǵyndardyń ony iterisýge kómekteskeni, ol turǵyndardyń kim ekeni belgili boldy. Mine, osy adamdar arqyly biz qylmyskerlerdi anyqtadyq. Olar — Jambyl aýdanynyń eki turǵyny. Olar bazarǵa baryp, Taldyqorǵan óńirinen kelgen saýdagerlerge kelip, bar malyn biraq satyp alatynyn aitqan, — dedi ministr.
Ministrdiń aitýynsha, qylmyskerler óz qurbandaryn osylaisha aldap, aýyl syrtyndaǵy saiǵa ertip barǵan.
— Sol saida olar úsh azamatty óltiredi.
Sóitip, mal men óli adamdar denesin kólikke tiep alyp bara jatqanda batpaqqa batady. Olar jaqyn mańdaǵy eldimeken turǵyndarynyń kómegine eriksiz júginedi.
Qazirgi ýaqytta qylmyskerler qolǵa tústi, qylmys jasalǵan zat — myltyq tárkilendi.
Olar óz erikterimen qurbandaryn qai jerge kómgenin kórsetip berdi.
Marqumdardyń denesine qatysty barlyq qajetti saraptama taǵaiyndaldy. Búgin jerleý rásimi ótedi. 36 bas mal tárkilenip alyndy. Ispen Almaty oblysynyń ishki ister departamenti ainalysyp jatyr. Jaqyn ýaqytta bul isti aiaǵyna jetkizip, ony sotqa ótkizemiz, — dedi Qalmuhambet Qasymov.
Óz kezeginde Úkimet basshysy Baqytjan Saǵyntaev Qasymovqa bul isti jeke baqylaýyna alýdy tapsyrdy, sóitip kelesi Úkimet otyrysynyń qoǵamdyq qaýipsizdik jáne zorlyq-zombylyqpen kúres taqyrybyna arnalatynyn málimdedi.
„Óz baqylaýyńyzǵa alyńyz. Bárimiz qoǵamnyń qaýipsizdigi, zorlyq-zombylyqpen kúres — bizdiń jumysymyzdyń alǵysharty ekenin jaqsy bilemiz. Sondyqtan taiaý kúnderi bul máseleni Úkimet otyrysynda qaraýymyz kerek dep oilaimyn„, — dedi Saǵyntaev.
Eske sala ketelik, aǵaiyndy taldyqorǵandyq úsh jigit bir apta buryn iz-tússiz joǵalyp ketken. Bir-bir shańyraqtyń ieleri ádettegidei, bazarǵa mal satýǵa ketken, biraq qaityp oralmady. Olardyń artynda 8 bala qalyp otyr.
Derekkóz: kaz.365info.kz
