بۇگىن ۇكىمەت وتىرىسىندا ق ر ىشكى ىستەر ءمينيسترى قالمۇحانبەت قاسىموۆ الماتى وبلىسىندا بولعان جانتۇرشىگەرلىك قايعىلى وقيعا تۋرالى بايانداپ بەردى دەپ حابارلادى Zakon.kz.
— 20-قىركۇيەكتە بىزگە الماتىعا ءۇش اعايىندى ازاماتتىڭ مال ساتۋعا كەتىپ، قايتىپ ورالماعاندىعى تۋرالى شاعىم كەلىپ ءتۇستى. ولار ەكى كولىكپەن 41 باس مالدى الماتى وبلىسىنا ساتۋ ءۇشىن الىپ شىققان. 21-قىركۇيەكتە ءبىرىنشى، 23-قىركۇيەكتە ەكىنشى كولىكتى تاپتىق. كەيىننەن بۇل كولىكتىڭ باتپاققا باتىپ قالىپ، جەرگىلىكتى تۇرعىنداردىڭ ونى يتەرىسۋگە كومەكتەسكەنى، ول تۇرعىنداردىڭ كىم ەكەنى بەلگىلى بولدى. مىنە، وسى ادامدار ارقىلى ءبىز قىلمىسكەرلەردى انىقتادىق. ولار — جامبىل اۋدانىنىڭ ەكى تۇرعىنى. ولار بازارعا بارىپ، تالدىقورعان وڭىرىنەن كەلگەن ساۋداگەرلەرگە كەلىپ، بار مالىن ءبىراق ساتىپ الاتىنىن ايتقان، — دەدى مينيستر.
ءمينيستردىڭ ايتۋىنشا، قىلمىسكەرلەر ءوز قۇرباندارىن وسىلايشا الداپ، اۋىل سىرتىنداعى سايعا ەرتىپ بارعان.
— سول سايدا ولار ءۇش ازاماتتى ولتىرەدى.
ءسويتىپ، مال مەن ءولى ادامدار دەنەسىن كولىككە تيەپ الىپ بارا جاتقاندا باتپاققا باتادى. ولار جاقىن ماڭداعى ەلدىمەكەن تۇرعىندارىنىڭ كومەگىنە ەرىكسىز جۇگىنەدى.
قازىرگى ۋاقىتتا قىلمىسكەرلەر قولعا ءتۇستى، قىلمىس جاسالعان زات — مىلتىق تاركىلەندى.
ولار ءوز ەرىكتەرىمەن قۇرباندارىن قاي جەرگە كومگەنىن كورسەتىپ بەردى.
مارقۇمداردىڭ دەنەسىنە قاتىستى بارلىق قاجەتتى ساراپتاما تاعايىندالدى. بۇگىن جەرلەۋ ءراسىمى وتەدى. 36 باس مال تاركىلەنىپ الىندى. ىسپەن الماتى وبلىسىنىڭ ىشكى ىستەر دەپارتامەنتى اينالىسىپ جاتىر. جاقىن ۋاقىتتا بۇل ءىستى اياعىنا جەتكىزىپ، ونى سوتقا وتكىزەمىز، — دەدى قالمۇحامبەت قاسىموۆ.
ءوز كەزەگىندە ۇكىمەت باسشىسى باقىتجان ساعىنتايەۆ قاسىموۆقا بۇل ءىستى جەكە باقىلاۋىنا الۋدى تاپسىردى، ءسويتىپ كەلەسى ۇكىمەت وتىرىسىنىڭ قوعامدىق قاۋىپسىزدىك جانە زورلىق-زومبىلىقپەن كۇرەس تاقىرىبىنا ارنالاتىنىن مالىمدەدى.
„ءوز باقىلاۋىڭىزعا الىڭىز. ءبارىمىز قوعامنىڭ قاۋىپسىزدىگى، زورلىق-زومبىلىقپەن كۇرەس — ءبىزدىڭ جۇمىسىمىزدىڭ العىشارتى ەكەنىن جاقسى بىلەمىز. سوندىقتان تاياۋ كۇندەرى بۇل ماسەلەنى ۇكىمەت وتىرىسىندا قاراۋىمىز كەرەك دەپ ويلايمىن„، — دەدى ساعىنتايەۆ.
ەسكە سالا كەتەلىك، اعايىندى تالدىقورعاندىق ءۇش جىگىت ءبىر اپتا بۇرىن ءىز-تۇسسىز جوعالىپ كەتكەن. ءبىر-بىر شاڭىراقتىڭ يەلەرى ادەتتەگىدەي، بازارعا مال ساتۋعا كەتكەن، ءبىراق قايتىپ ورالمادى. ولاردىڭ ارتىندا 8 بالا قالىپ وتىر.
دەرەككوز: kaz.365info.kz
