2025 jyly 29 mamyrda "Teńizshevroil" JShS (TShO) kompaniia basshylyǵyndaǵy ózgeristerge qatysty aqparat taratty. Oǵan sáikes, 2025 jylǵy 10 maýsymnan bastap TShO bas direktory laýazymyna Ýiliam Lakobi taǵaiyndalady. Ol bul laýazymdy 2021 jyldan beri atqaryp kelgen Kevin Laionnyń ornyn baspaq, dep habarlaidy Dalanews.kz kompaniia baspasóz qyzmetine silteme jasap.
Al Kevin Laion Shevron kompaniiasynyń bas keńsesindegi jańa basshylyq qyzmetke taǵaiyndaldy.
"Kúrdeli synaqtar men mańyzdy belesterge toly kezeńderde TShO-nyń basshysy bolý men úshin zor mártebe boldy. Búgin jańa taraýdyń beti ashylady – TShO ujymy Qazaqstan igiligine qyzmet etýin ári qarai da jalǵastyrady degen nyq senimmen, qyzmetimdi Ýiliam Lakobige tapsyramyn. Qazaqstan úkimetine, TShO aktsionerlerine, adal qyzmetkerlerimiz ben biznes-seriktesterimizge jáne Atyraý halqyna jyldar boiy kórsetip kele jatqan qoldaýy men yntymaqtastyǵy úshin shyn júrekten alǵysymdy bildiremin", – dedi Kevin Laion.
Ýiliam Lakobi óziniń 31 jyldyq mansabynda AQSh, Angola jáne Indoneziiadaǵy Shevron biznes bólimshelerinde ártúrli injenerlik-tehnikalyq jáne basshylyq qyzmetterdi atqarǵan. 2021 jyldan bastap ol Ońtústik Afrikadaǵy Shevron strategiialyq biznes bólimshesiniń basqarýshy direktory bolyp, sol qyzmetinde Angola men Kongo Respýblikasyndaǵy Shevron aktivterine, sonyń ishinde Angoladaǵy suiytylǵan tabiǵi gaz óndirisiniń iri jobasyna jaýapty boldy. Onda Ýiliam Lakobi jergilikti qamtý jáne kadrlardy damytýǵa, jergilikti halyqtyń ál-aýqatynyń artýyna yqpal etken tamasha basshy retinde tanyldy.
TShO bas direktory qyzmetine kiriskeli turǵan Ýiliam Lakobi:
"TShO bas direktory bolyp taǵaiyndalý - men úshin úlken mártebe. Teńiz ken orny tehnikalyq turǵydan dúnie júzindegi eń kúrdeli ken oryndarynyń biri bolǵandyqtan, qaýipsiz ári senimdi óndiristi qamtamasyz etý jáne Qazaqstan ekonomikasynyń órkendeýine yqpaldasý kompaniiamyzdyń basty baǵyty bolyp qala bermek. Men Qazaqstan úkimetimen, aktsionerlerimizben, sonymen birge ózimiz turyp, qyzmet etip otyrǵan óńirdiń halqymen ózara seriktestigimizdi odan ári nyǵaitý múmkindigin asyǵa kútemin" - deidi.
Buǵan deiin Bektenov Shell kompaniiasy ókilderimen kezdesip, munai-gaz jobalaryn talqylaǵanyn jazǵanbyz.
