Halyqpen didarlasqan óńir basshysy aimaqtyń damýyna kóz júgirtip, jekelegen salalardaǵy túiitkilder týraly da tarqatyp aitty. Uiǵyr aýdany oblys boiynsha júgeri, jemis-jidek, qus etin óndirýdiń negizgi óndirýshileriniń biri bolyp tabylady. Sáikesinshe, oblys ekonomikasynyń damýyna zor úles qosyp keledi.
Aǵymdaǵy jyldyń 8 aiynyń qorytyndysy, aýdan jaqsy nátijelerge qol jetkizgen. Biraq, oblysta júrgizilip jatqan jumystarǵa qaramastan, jekelegen salalarda birqatar máseleler týyndaýda. Bul týraly Marat Eleýsizuly óz sózinde tilge tiek etti.
Uiǵyr aýdany oblysta aýyl sharýashlyyǵy daqyldarynyń jalpy egis kólemi boiynsha 9-shy orynda tur. Aýdannyń barlyq egistik alqaptarynyń úshten birin júgeri ósirýge tiesili. Atalǵan daqyldan alynatyn ónim kólemi 83 myń tonnany qurady.
– Uiǵyr aýdany barlyq oblys kóleminde ósiriletin júgeriniń tórtten bir bóligin beredi jáne oblys boiynsha Eńbekshiqazaq aýdanynan keiin ekinshi oryndy alady Bul jaqsy kórsetkish, – dep astyn syzyp aityp ótti oblys ákimi.
– Biz agroónerkásip kesheni ónimderin qaita óńdeýdi damytý týraly aityp otyrmyz jáne bul sala áli kúnge deiin durys jolǵa qoiylmaǵan. Bul máseleni sheshý kerek, – dedi Marat Sultanǵaziev.
Júgeri ósirýmen qatar Uiǵyr aýdany jemis-jidek daqyldary men júzimdi ósirý boiynsha oblys kóleminde ekinshi oryndy alady, olardyń alqaby 4 myń gektarǵa jetip jyǵylady.
Qýantarlyǵy jemis-jidekti óńdeitin kásiporyn bar. Aimaqtaǵy iri óndirýshi – «Shonjy Agro» JShS osy ispen ainalysady, ol 500 gektar jerde órik, shabdaly, qara órik jáne shie ósiredi.
Sonymen qatar, qaita óńdeýmen jylyna 1,4 myń tonna shikizat óńdeýge qaýqarly «Agro Processing» firmasy den qoiǵan edi. Ókinishke orai, sol kásiporyn búginde toqtap tur.
Oblys ákimi osynyń bárin nazarǵa alyp, aýdannyń jemis-jidek daqyldary boiynsha áleýeti zor, investorlardy tarta otyryp, olardy qaita óńdeýdi damytý qajettigin tapsyrdy.
Aýdanda asta-tók jemis-jidek jinalǵanymen ony saqtaityn oryn tapshy. Mundaǵy jalpy syiymdylyǵy 120 tonna bolatyn eki kókónis saqtaý qoimasy jinalǵan ónimniń tek 0,2%-yn ǵana saqtai alady. Odan bólek bir qoima apatty jaǵdaida, kúrdeli jóndeýdi talap etedi.
