Ustazdar áýleti
Zaýre Tynysbaikyzynyń ákesi Tynysbai Amanbaev Aral óńirine joldamamen baryp, sondaǵy Abai aýyldyq mektebinde qatardaǵy muǵalimdikten mektep basshylyǵyna deiin kóterilip, sol mektepten zeinetke shyqqan qurmetti azamat. Azamattyǵy sol, mamandyǵyna degen adaldyqpen atqarǵan isin aiaǵyna deiin jetkizip, el alǵysyna bólenip zeinet jasynda ǵana eline qaitqan. Anasy Aǵila da institýttan keiin jas otaýdyń shańyraǵyn shashaý shyǵarmai azamatynyń sońynan ere bilgen aiaýly jan. Mektep kitaphanasynyń qoryn molaityp, oqýshylar arasynda ártúrli is-sharalardyń uitqysy bop júrgen Aqtóbeniń áppaq qyzy el-jurtyna da erekshe unapty. Aýyl adamdary, kópshiligi, kópshiligi emes-aý, qazirgi aýyl turǵyndarynyń barlyǵy derlik osy azamattardyń aldynan dáris alǵan. Áńgimelerinde osy aýyldan taraǵan árbir azamat «Tynysbai aǵai» men «Aǵila apailaryn» erekshe yqylaspen eske alyp otyrady.
– Meniń ata-anam oqytqan sol mekteptiń oqýshylary oqýlaryn bitirip kelip, bizderge sabaq berdi, – deidi Zaýre Tynysbaikyzy. – Sonda meniń ata-anam ustazdarymnyń ustazy dep maqtanatynmyn. Bizdegi urpaq sabaqtastyǵy osylaisha ádemi órbip jatatyn. Ustazdarǵa qarap oiymyzdy túzep qana qoimai, barlyq is-áreketterin úlgi tutatynbyz. Boi túzep, arman qýatynbyz.
Arman qýyp Almatyǵa kelgen arý qyz Qazaq Memlekettik Ýniversitetine túsip, bolashaq jaryn ýniversitettiń himiia fakýltetinen jolyqtyrady. Barǵan jerinde matematika mamany Jumagúl apasy da naǵyz ustaz bop shyńdalýyna járdem etedi. Búginde ózi de pedagogikalyq is-tájiribesinde mamandyǵyn jetik biletin, tájiribeli ustaz. 2011-jyldan №43 JBB mektepte direktordyń oqý isi jónindegi orynbasary qyzmetin atqaryp keledi. «Qazaqstan Respýblikasynyń Bilim berý isiniń qurmetti qyzmetkeri» belgisiniń iegeri, 2013j. Jyl saiyn oqýshylardy shyǵarmashylyq jumysqa baýlyp, ǵylymi jobalar baiqaýyna aparyp, pán olimpiadalaryna qatystyryp júldeli oryndar ielenýde.
Tájiribeli ustazdyń «Órleý» BAUO» AQ filialy Almaty q. boiynsha PQ BAI óz bilimin úzdiksiz kóterip, jan-jaqty izdenip, jańasha oqytýǵa bet burýynyń nátijesinde sabaq beretin synyptarynda da árbir oqý jylynda bilim sapasy da jaqsara túsýde. 2014 jyly PShO-nyń Almaty qalasy filialynyń deńgeili baǵdarlamasy aiasynda birinshi (ilgeri) deńgei baǵdarlamasy boiynsha kýrsty jáne 2016 jyly «Tájiribedegi refleksiia» jalpy bilim beretin mektepterdegi pedagogika kadrlarynyń kásibi damý baǵdarlamasy boiynsha mektep trenerlerin oqytý kýrsyn bitirip, áriptesterimen óz tájiribesin bólisýde.
Zaýre Tynysbaiqyzynyń eńbektegi jetistikteri árdaiym eskerilip, Almaty qalasy Bilim basqarmasy, Jetisý aýdandyq bilim bólimi, kásipodaq komiteti, Jetisý aýdany ákimi tarapynan alǵys hattarmen, gramotalarmen marapattalyp keledi.
Sóz sońynda aitarymyz, «Uiada ne kórseń, ushqanda sony ilersiń» degendei Z. Amanbaeva otbasynan alǵan ónegesin ózgelermen bólisip, óreli isti órbitip keledi. Urpaq tárbieleý jolyndaǵy tolymdy eńbekterińiz jemisti bolsyn, áýlet júgin arqalaǵan aiaýly jan! Kásibi mereke qarsańynda Sizdiń otbasyńyzǵa amandyq, denińizge saýlyq tileimiz!
Sh. Biten
