Bul týraly "Amerika daýysyna" Ózbekstan prezidentiniń Aýǵanstan jónindegi arnaiy ókili Ismatýlla Irgashev habarlady.
Biyl qańtar aiynda "Taliban" Ózbekstan men Tájikstannan 40 tikushaqty qaitarýyn talap etken.
Tálipterdiń qorǵanys ministrligi ókili Inoiatýlla Horezmi "Eki eldiń (Ózbekstan men Tájikstan) ókilderine tikushaqtardy Aýǵanstannyń qazirgi biligine qaitarý týraly birneshe márte usynys jasaldy" dep málimdedi.
Byltyr tamyzda "Taliban" qozǵalysy bilikke kelgen soń aýǵan áskeriniń 22 ushaǵy men 24 tikushaǵy Ózbekstanǵa qondy. Aýǵannyń 18 dana áýe tehnikasy Tájikstanǵa ótti.
Ismatýlla Irgashevtiń málimdeýinshe, áýe tehnikasyna AQSh úkimeti qun tólegen.
– Ol Aýǵanstannyń buǵan deiingi úkimetin qarjylandyrdy. Osylaisha, bizdiń sheshimimiz Vashingtonǵa tikelei bailanysty bolady. Biz áskeri tehnikalardy AQSh-pen aradaǵy kelisimge sáikes saqtap otyrmyz. Ony "Talibanǵa" da habarladyq, – dedi Ismatýlla Irgashev.
AQSh qorǵanys ministrliginiń ókili "Amerika daýysyna" Ózbekstan men Tájikstan ushaqtar men tikushaqtardy Aýǵanstanǵa qaitarmaitynyn rastady. Degenmen Vashington bul tehnikaǵa qatysty áli túpkilikti sheshim qabyldamaǵan.
