بۇل تۋرالى "امەريكا داۋىسىنا" وزبەكستان پرەزيدەنتىنىڭ اۋعانستان جونىندەگى ارنايى وكىلى يسماتۋللا يرگاشيەۆ حابارلادى.
بيىل قاڭتار ايىندا "تاليبان" وزبەكستان مەن تاجىكستاننان 40 تىكۇشاقتى قايتارۋىن تالاپ ەتكەن.
تالىپتەردىڭ قورعانىس مينيسترلىگى وكىلى ينوياتۋللا حورەزمي "ەكى ەلدىڭ (وزبەكستان مەن تاجىكستان) وكىلدەرىنە تىكۇشاقتاردى اۋعانستاننىڭ قازىرگى بيلىگىنە قايتارۋ تۋرالى بىرنەشە مارتە ۇسىنىس جاسالدى" دەپ مالىمدەدى.
بىلتىر تامىزدا "تاليبان" قوزعالىسى بيلىككە كەلگەن سوڭ اۋعان اسكەرىنىڭ 22 ۇشاعى مەن 24 تىكۇشاعى وزبەكستانعا قوندى. اۋعاننىڭ 18 دانا اۋە تەحنيكاسى تاجىكستانعا ءوتتى.
يسماتۋللا يرگاشيەۆتىڭ مالىمدەۋىنشە، اۋە تەحنيكاسىنا اقش ۇكىمەتى قۇن تولەگەن.
– ول اۋعانستاننىڭ بۇعان دەيىنگى ۇكىمەتىن قارجىلاندىردى. وسىلايشا، ءبىزدىڭ شەشىمىمىز ۆاشينگتونعا تىكەلەي بايلانىستى بولادى. ءبىز اسكەري تەحنيكالاردى اقش-پەن اراداعى كەلىسىمگە سايكەس ساقتاپ وتىرمىز. ونى "تاليبانعا" دا حابارلادىق، – دەدى يسماتۋللا يرگاشيەۆ.
اقش قورعانىس مينيسترلىگىنىڭ وكىلى "امەريكا داۋىسىنا" وزبەكستان مەن تاجىكستان ۇشاقتار مەن تىكۇشاقتاردى اۋعانستانعا قايتارمايتىنىن راستادى. دەگەنمەن ۆاشينگتون بۇل تەحنيكاعا قاتىستى ءالى تۇپكىلىكتى شەشىم قابىلداماعان.
