Premer-ministrdiń orynbasary Qanat Bozymbaevtyń tóraǵalyǵymen ótken otyrysqa salalyq ministrlikter men úsh oblystyń ákimdikteriniń ókilderi qatysty. Keńeste oblys ákimi Berik Ýáli óńirdiń ózekti máseleleri týraly baiandady,– dep habarlaidy Dalanews.kz
Ulttyq ekonomika ministrliginiń málimetinshe, 2024 jyldyń qorytyndysy boiynsha óńirlik standarttar júiesi boiynsha obektilermen jáne kórsetiletin qyzmettermen qamtamasyz etý deńgeii 66,1 paiyzdy qurady. Onyń ishinde Abai oblysynyń kórsetkishi 58,1 paiyz (respýblika boiynsha 19-shy oryn).
Oblystaǵy halyqtyń 40 paiyzǵa jýyǵy – aýyl turǵyndary. Eldi mekendegi turǵyndardyń kópshiligi jol, sý, jaryq, internet siiaqty bazalyq qyzmetterge tolyq qol jetkize almai otyr. Óńirdegi aýyldardyń ál-aýqatyn kóterý úshin keminde 267,5 mlrd teńge qajet. Bul óz kezeginde mektepter men balabaqshalar, meditsinalyq mekemeler, mádeniet jáne sport nysandaryn, jol, sý, jylý júielerin jańartýǵa múmkindik beredi.
«Shekara mańynda ornalasqan oblystyń 42 aýylynda sońǵy úsh jyl ishinde halyq sany 2 myń adamǵa azaiǵan. Memleket basshysynyń tapsyrmasymen osy aýyldardy damytý jónindegi jańa Zań jobasy qabyldanǵan jaǵdaida aýyldarǵa jańa serpin beretin edi»,- dedi oblys ákimi.
Aimaq basshysy keńeste aimaqtaǵy Aiagóz jáne Shar sekildi shaǵyn qalalardyń turǵyndary «Aýyl el besigi», «Diplommen aýylǵa!» siiaqty baǵdarlamalardan tys qalyp otyrǵanyn jetkizdi. Jańasemei aýdanynyń aýyldaryna 14 jańa meditsinalyq nysan salýǵa, «Aýyl amanaty» aiasynda óńirge qosymsha qarjy bólýge kómektesýdi surady.
- «Aýyl Amanaty» baǵdarlamasymen biyl Abai oblysyna 1 mlrd. teńge ǵana qarastyrylǵan. Aldyńǵy baiandamashy Pavlodar men Shyǵys Qazaqstan oblystaryna 2, 3 milliard teńgeden bólingenin aitty. Biz qosymsha 2,8 mlrd. teńgege 326 jobany ázirlep, QR Ulttyq ekonomika ministrligine usyndyq. Qarjylandyrýǵa qoldaý kórsetýlerińizdi suraimyz. Prezident Kókshetaýda ótken Ulttyq quryltaida «Úkimet jańadan qurylǵan oblystardyń ahýalyn baqylaýda ustap, kómektesýi qajet» degen bolatyn. Sondyqtan sizderden bizdiń óńirge naqty qoldaý kútemiz, - dedi oblys ákimi.
Keńesti qorytyndylaǵan Premer-Ministrdiń orynbasary tiisti ministrlikterge naqty tapsyrmalar berdi. Densaýlyq saqtaý ministrligine Abai oblysynyń Jańasemei aýdanyna 14 meditsinalyq pýnkt salý máselesin ulttyq jobaǵa engizýdi tapsyrdy.
«Oblystyń qurylǵanyna úsh jyl ótti, áleýmettik-ekonomikalyq damý kórsetkishteriniń ári qarai ósýin qamtamasyz etý qajet. Osyǵan bailanysty barlyq óńirlik baǵdarlamalyq qujattardyń sharalaryn tiimdi iske asyrýdy qamtamasyz etsin, barlyq kórsetkishterdiń ósýi úshin qosymsha sharalar qabyldansyn. Óńirde qordalanǵan másele kóp. Úkimet tarapynan Abai oblysyna jan jaqty qoldaý kórsetetin bolamyz. Ministrlikter tarapynan kedergi bolsa tikelei ózime habarlassańyz bolady»,- dedi Qanat Bozymbaev.
