7 aqpanda AQSh Halyqaralyq Damý agenttigine jumysqa alynǵan qyzmetkerler álem boiynsha ákimshilik demalysqa jiberiledi, dep habarlaidy Dalanews.kz.
“Aldaǵy ýaqytta qosymsha nusqaýlar beriledi. Barsha qyzmetkerge kórsetken qyzmeti úshin alǵys bildiremiz”, — delingen habarlamada.
Aita keteiik, USAID Qazaqstanda ekonomikalyq ártaraptandyrýdy qoldaý, demokratiialyq reformalardy yntalandyrý jáne azamattyq qoǵamdy damytý baǵytynda mańyzdy jobalardy júzege asyrdy. Mysaly, agenttik Qazaqstannyń tsifrlyq ekojúiesin damytý boiynsha baǵalaý júrgizip, 12 usynys ázirledi.
Agenttiktiń qyzmetiniń aiaqtalýy Qazaqstan men AQSh arasyndaǵy yntymaqtastyqtyń jańa kezeńin bildiredi. Qazaqstannyń damý maqsattaryna qol jetkizý úshin basqa halyqaralyq uiymdarmen jáne seriktestermen birlesken jumys jalǵasady.
Eske salaiyq, buǵan deiin Aq úi USAID-tiń "absýrdty" shyǵyndaryn jariia etken edi.
AQSh ákimshiligi atyshýly USAID-tyń (Halyqaralyq damý jónindegi agenttik) "absýrdty" jobalarǵa qyrýar qarjy bólgenin dáleldeitin daýly qujatty jariialady.
"USAID ondaǵan jyl boiy salyq tóleýshilerdiń aqshasyn tógip-shashty. Biz ony dereý toqtatamyz", – delingen Aq úidiń málimdemesinde.
Aq úi usynǵan aqparat boiynsha, USAID qarajaty túrli elderde "árqily" maqsatta paidalanylǵan. Máselen:
Vetnamǵa elektromobilder satyp alýǵa $2,5 mln;
Kolýmbiiadaǵy transgenderlerdiń operasyna $47 myń;
Perýdegi "transgenderlik komiksti" ázirleýge $32 myń;
Gvatemaladaǵy jynys aýystyrý operatsiialary men "LǴBT belsendiligine" $2 mln;
Siriiadaǵy «Ál-Kaidaǵa» qatysy bar sodyrlarǵa júzdegen myń portsiia tamaq;
Aýǵanstandaǵy kóknár egistigin sýarý, tyńaitqysh satyp alý jáne qural-jabdyqqa júzdegen million dollar bólingen.
Aq úidiń aitýynsha, bul tizim tolyq emes.
"Prezident Tramptyń tusynda salyq tóleýshiniń aqshasyn orynsyz jumsaý búginnen bastap toqtaidy”, – dep atap ótti AQSh ákimshiligi.
