Abai oblysyndaǵy jantúrshigerlik apatta qaza tapqan balalardyń ákesi jaýapqa tek júrgizýshini ǵana emes, oǵan «saý» degen anyqtama bergenderdi de tartýdy talap etti, dep habarlaidy Dalanews.kz.
Sottyń alǵashqy otyrysynda japa shekken balalardyń ákesi Ernar Býlabbaev jaýapkershilikke tek júrgizýshi ǵana emes, densaýlyǵyna qaramastan ony kólik júrgizýge jibergender de tartylýy tiis ekenin málimdedi.
«Aldymen ol aýyrmaimyn dedi, keiin aýyramyn dedi. Esepte turmaimyn dep aitty. Júrgizýshi kýáligin aýystyrǵan kezde ózin saý dep jalǵan anyqtama bergen. Biraq bul anyqtamany kim bergenin, kýálikti kim rásimdegenin aitpady. Sol adamdy taýyp, jazalaý kerek. Basty talabymyz osy», - deidi ol.
Eske sala ketsek, 19 tamyzda Abai oblysynyń Úrjar aýdanynda 55 jastaǵy júrgizýshi úidiń qaqpasy mańynda oinap júrgen alty balany kólikpen qaǵyp ketken edi. Sol sátte úsheýi - eki, bes jáne segiz jastaǵy balalar oqiǵa ornynda qaza tapty. Sondai-aq 6-9 jas aralyǵyndaǵy taǵy úsh bala jaraqat aldy.
Kólik júrgizýshisi eki aiǵa qamaýǵa alyndy. Onyń týystarynyń aitýynsha, apatqa júrek talmasy sebep bolǵan.
Aita keteiik, buǵan deiin Astana qalalyq Densaýlyq saqtaý basqarmasynyń baspasóz qyzmeti zardap shekken eki bala aýrýhanadan shyqqany týraly málimdegen edi.
