Shyǵys Qazaqstan oblysy týrızm salasyn damytýda kósh bastap keledi. Sońǵy jyldary Alakólge kelip demalýshylardyń sany kúrt óskeni belgili. Týrıserdiń demalys aımaǵyn sharshamaı tez jetýi úshin SHQO ákimdigi Úrjar aýdanynda shaǵyn áýejaı salýdy qolǵa alǵan bolatyn. Oblys ákimniń orynbasary Almashan Smatlaev Úrjardaǵy salyp jatqan shaǵyn áýejaı aldaǵy jyly paıdalanýǵa beriletinin aıtty, – dep habarlaıdy Dalanews.kz.

– Búginde Óskemen qalasynyń áýejaıyna kúrdeli jóndeý jumystary júrip jatqany belgili. O basta Óskemndegi áýejaıdyń belgi beretin shamdaryn Úrjardaǵy áýejaıǵa ornatý josparlanǵan edi. Keıinnen munyń tehnıkalyq turǵydan durys emes ekenin anyqtalǵannan keıin, jańa jospar daıyndaldy. Qazirgi tańda joba aıaqtalýǵa jaqyn. 2022 jyldyń alǵashqy toqsanynda barlyq jumystar aıaqtalayp, jazdan bastap Úrjar áýejaıy ushaqtardy qabyldaı bastaıtyn bolady, – dedi oblys ákimniń orynbasary.

Buǵan deıin SHQO ákimdigi Úrjar áýejaıyn 2022 jyldyń sáýir aıynda aıaqtaýdy josparlaǵan-dy. Biraq alǵashqy jobaǵa birqatar ózgerister engizilgennen keıin áýejaı qurylysy jazǵa syrǵyǵanyn aıta ketýimiz kerek.

Búginde Úrjar áýejaıynyń ushyp, qony jolaǵy zaman talabyna saı uzartylyp jatqan belgili. Buǵan Jumyspen qamtýdyń jol kartasy aıasynda 4,7 mlrd teńge bólingen bolatyn.

Jańǵyrtý jumystary aıaqtalǵannan keıin Úrjar áýejaıy reaktıvti jáne týrboqalaqshaly VS Embraer 190, Bombardier Q-400, CRJ-200 áýe kemelerin kúndiz, túni qabyldaıtyn múmkindikke ıe bolady.