Ulttyq qaýipsizdik komıteti Almaty oblysy İle aýdany ákiminiń orynbasary Qýat Aqshabaevtyń ustalýyna baılanysty resmı aqparat taratty, dep habarlaıdy Dalanews.kz politico saıtyna silteme jasap.
Komıtettiń málimetinshe, qazirgi ýaqytta atalǵan derek boıynsha sotqa deıingi tergeý amaldary júrip jatyr.
"Sotqa deıingi tergep-tekserý júrgizilýde. Qylmystyq-prosestik kodekstiń 201-babynyń 1-bóligine sáıkes, is boıynsha ózge málimetter jarıa etilmeıdi", - dep habarlady UQK.
Buǵan deıin áleýmettik jelilerde Ulttyq qaýipsizdik komıtetiniń sybaılas jemqorlyqqa qarsy baǵyty boıynsha arnaıy operasıa ótkizilgeni týraly aqparat taraǵan edi. Resmı emes derekkózder Qýat Qarabaıuly Aqshabaevtyń 28 mıllıon teńge kóleminde para aldy degen kúdikke ilingenin málimdep otyr.
Aıta keteıik, Qýat Aqshabaev İle aýdany ákiminiń orynbasary qyzmetine 2025 jyldyń aqpan aıynda ǵana taǵaıyndalǵan bolatyn. 1986 jyly dúnıege kelgen sheneýnik buǵan deıin Eńbekshiqazaq aýdany ákiminiń orynbasary, Rahat aýyldyq okrýginiń ákimi, sondaı-aq Esik qalasy ákiminiń orynbasary laýazymdaryn atqarǵan.
Eńbek jolyn esepshilik qyzmetten bastaǵan ol keıin Halyqqa qyzmet kórsetý ortalyqtarynda da jumys istegen.
