Májilis depýtaty Ashat Aimaǵambetov Nazarbaev Ýniversitetindegi bilim berý, memlekettik saiasat jáne biznes mektepterin biriktirý týraly usynysqa alańdaýshylyq bildirdi. Bul pikirin ol Májilistegi Komitet otyrysynda aitty. Onda 2024 jylǵy respýblikalyq biýdjettiń atqarylýy jónindegi Úkimet esebi aiasynda ýniversitet jumysy qaralǵan, dep habarlaidy Dalanews.kz.
Aimaǵambetovtyń aitýynsha, ýniversitetke bólinetin qarjy kóleminiń qysqarýyna bailanysty ońtailandyrý máselesi týyndaǵan. Alaida depýtat sapa, akademiialyq erkindik jáne halyqaralyq bedel únemdeý saiasatynyń qurbany bolmaýy tiis dep esepteidi.
“Biriktirý ideiasy optimizmnen góri alańdaýshylyq týǵyzady. Máselen, GSE qazirgi tańda álemdik úzdik 200 oqý orny qataryna ense, GSPP men GSB — 600–800 qatarda. Biriktirý nátijesinde jalpy reiting tómendep, ýniversitettiń bedeli men tartymdylyǵy álsireýi múmkin. Bilim berý mektebiniń (GSE) biregeiligi qaterge ushyraidy. GSE – Qazaqstandaǵy bilim salasyndaǵy sapaly zertteýlermen tanylǵan sanaýly akademiialyq brendterdiń biri. Birigý onyń ózindik ereksheligin joiýy yqtimal.”, — dedi depýtat.
Sondai-aq ol ár mekteptiń óz akademiialyq mádenieti men halyqaralyq akkreditatsiia talaptary bar ekenin atap ótti. Distsiplinarlyq fokýs pen zertteý baǵyttarynyń bulyńǵyrlanýy halyqaralyq granttar men kadrlyq áleýetke de keri áser etýi múmkin.
“Akademiialyq mádenietter ártúrli. Osyndai ártúrli tásilderdi aralastyrý kóbinese qaqtyǵystarǵa, maqsattan aýytqýǵa jáne akademiialyq ortaǵa nuqsan keltiredi.
Akkreditatsiia táýekeli bar. Ár mektep halyqaralyq akkreditatsiiadan óz standarttary boiynsha ótedi: AACSB, pedagogikalyq jáne zertteý talaptary. Biriktirilgen qurylym bul talaptarǵa sai bolmaý qaýpin tóndiredi. Ár túrli salalardyń ózara bailanysy tartymdy ideia bolǵanymen, aiqyn identichnost pen fokýstyń joqtyǵynan akademiialyq tereńdiktiń joǵalýy múmkin. Buny tolyq biriktirýsiz de, ortaq baǵdarlamalar men jobalar arqyly damytýǵa bolady”, — dep eskertti Aimaǵambetov.
Sonymen qatar ol GSE-ni nólden bastap qurǵan oqytýshylar avtonomiianyń, akademiialyq ortanyń jáne damý múmkindikteriniń joǵalýyna bailanysty ketýi múmkin ekenin de jetkizdi.
“Qazirgi tańda jańa ýniversitetter ashylyp jatqanyn eskersek, stýdentter, zertteýshiler men granttar da olarmen birge ketýi múmkin”, — dep qosty ol.
Depýtattyń pikirinshe, biriktirý únemdeýge kepildik bermeidi.
“Kadrlardyń ketýi, ákimshilik shyǵyndardyń ósýi, ártúrli akademiialyq mádenietterdiń qaqtyǵysy nátijesinde ýáde etilgen tiimdilik joiylyp ketýi múmkin. Is júzinde bul únemdeýden góri qosymsha qiyndyqtar týǵyzýy yqtimal”, — dedi ol.
Onyń pikirinshe, Nazarbaev Ýniversiteti – bilim berý sapasynyń jańa simvolyna ainalǵan biregei joba. Sondyqtan sheshimder strategiialyq turǵyda qabyldanýy tiis.
"Bul máselede ýniversitet basshylyǵy baiypty ári salmaqty sheshim qabyldaidy dep senemin", — dedi depýtat.
