Erteń – 8 tamyz, iaǵni Tramptyń Reseige qoiǵan ýltimatýmynyń sońǵy kúni. Ol oryndalsa, Ýkrainadaǵy soǵys aiaqtalýy tiis. Al oryndalmasa, Reseige qarsy sanktsiialar ishindegi eń qataly – munai salasyna qatystysy iske qosylmaq. 7 tamyz - búginniń ózinde geosaiasi aýannyń qalai qarai oiysyp jatqany anyq ańǵarylady. Muny Dalanews.kz saitynan oqyp-bile otyryńyzdar.
Qazir Aq úi abyr-sabyr. Jýrnalister aldyna bir shyǵyp úlgergen Tramp, ázirge Resei prezidenti Vladimir Pýtinmen jáne Ýkraina kóshbasshysy Vladimir Zelenskiimen jeke kezdesý yqtimaldyǵy joǵary ekenin ǵana aitty. Al ýltimatýmnyń oryndalý-oryndalmaý jaiy týraly AQSh prezidenti jaq ashyp, eshteńe aitpady. "Aýzy kúigen úrip ishedi" degenniń kerin keltirip, tek "ótkendegidei bolyp júrmesin, sondyqtan bul rette asyǵystyq tanytqym kelmeidi" dep qysqa qaiyrdy Donald Tramp (ótkende ol Ýkrainadaǵy áskeri is-qimyldar aiaqtaldy dep jariialai salǵan, biraq sóz júzindegi dúnie iske kelgende júrmeitin bolyp shyqqan. Sodan beri Donald Vovaǵa qatty ókpeli – red.).
Degenmen atalǵan taqyryp turǵysynda kesheli beri shalt júris-turystar bolyp jatyr. Kúni keshe Vladimir Pýtin AQSh prezidentiniń arnaiy ókili Stiven Ýitkoffty qabyldady. Aradaǵy áńgime shamamen úsh saǵatqa sozyldy. Qos taraptyń Ýkraina daǵdarysyn talqylaǵany, Resei amerikalyq tarapqa ýkrain máselesi boiynsha belgiler berip, Tramptan da tiisti belgilerdi qabyldaǵany aitylady.
"Kreml Pýtin men Ýitkofftyń kelissózderi týraly tek Tramp odan habardar bolǵannan keiin ǵana egjei-tegjeili aita alady", - dedi Resei Federatsiiasy prezidentiniń kómekshisi Iýrii Ýshakov.
Osy kezdesýden keiin kóp uzamai, jarty saǵattan keiin Aq úidiń saitynda Donald Tramp qol qoiǵan jarlyq mátini jariialandy.
"Úndistan úkimeti qazirgi ýaqytta Resei Federatsiiasynan munaidy tikelei nemese janama túrde importtap alyp otyr dep oilaimyn. Tiisinshe, qoldanystaǵy zańnamaǵa sáikes Úndistannan Amerika Qurama Shtattarynyń kedendik aýmaǵyna importtalatyn taýarlarǵa arnaiy mólsherleme boiynsha qosymsha 25 paiyz baj salynady", delingen jarlyqtyń mátininde.
Bul tarif qujatqa qol qoiylǵannan keiin 21 kúnnen keiin kúshine enedi. Demek, 27 tamyzda Resei munaiyn tutynyp qana qoimai, ony óńdep Eýropaǵa satý arqyly ekonomikasyn kóterip otyrǵan Úndistanǵa qiyn timek. Al Úndistan Reseidiń seriktesi ári BRIKS sheńberinde kóptegen jobalarda birin-biri qoldap otyrady. Sondai-aq, Aq úi Úndistannan bólek Resei munaiyn importtaityn basqa elderge de tarif saiasatyn qatańdatýy múmkin ekenin jariialady. Sebebi AQSh-tyń pikirinshe, Resei munaiyn satyp alý Ýkrainadaǵy áskeri is-qimyldardy qarjylandyrýmen para-par.
Tramp Úndistanǵa qarsy qosarlas sanktsiialar engizý tek bastamasy ekenin aitty.
"Nebári arada segiz saǵat ótti. Ary qarai ne bolatynyn kóreiik... Sizder áli budan da zoryn kóresizder. Bul tek bastamasy ǵana. Budan da kóp bolady. Qosarlas sanktsiialardy aitamyn", - dedi Amerika prezidenti. Sóitken Tramp Qytaiǵa qarsy osyndai sharalardyń engizilý yqtimaldylyǵyn da joqqa shyǵarmady.
Al Úndistan shyp-pyr etip qaldy. Niý-Deli suq saýsaǵymen Batysty nusqap: "Qarańyzdarshy, AQSh pen Eýropalyq odaq Reseimen saýda-sattyq jasamai jatqan joq emes, jasap jatyr. Soǵan qaramastan bizge kelgende, Máskeýmen bailanysty úz deidi. Muny qalai túsinýge bolady" dep airan-asyr. Al Qytaida koronavirýs kezindegi sharalar qaita qolǵa alyna bastaǵan. Chikýngýnia degen jańa virýs shyǵypty deidi. Onyń geosaiasatqa qatysy bar ma, joq pa, ol jaǵyn bilmedik. Belgilisi, Qytai karantinge tars jabylyp qalýy bek múmkin...
