Qazaqstan Ulttyq qorynan qyrkúiekte ishki valiýta naryǵynda $200-300 mln kóleminde valiýta satylady, dep habarlaidy dalanews.kz.
Ulttyq banktiń málimetinshe, tamyz qorytyndysy boiynsha teńge baǵamy 2,6%-ǵa nyǵaiyp, bir dollar úshin 461,57 teńgeni qurady. Qazaqstan qor birjasyndaǵy (KASE) saýda-sattyqtyń ortasha táýliktik kólemi $389 mln-nan $415 mln-ǵa deiin ósti. Ai qorytyndysynda saýda-sattyqtyń jalpy kólemi $8,7 mlrd boldy.
Tamyzda Ulttyq qordan birjalyq naryqta $200 mln kóleminde valiýta satylǵan. Bul jalpy saýda kóleminiń 2,3%-yn nemese shamamen $9,5 mln-dy qurady.
Qyrkúiekte Ulttyq bank Ulttyq qor qarajaty esebinen birjalyq naryqta $200-300 mln kóleminde valiýta satýdy josparlap otyr.
Sonymen qatar qyrkúiekten bastap Ulttyq bank Ulttyq qor operatsiialaryn ishki valiýta naryǵynda «aina qaǵidaty» boiynsha júrgizýge kirisedi. Bul tetik aiasynda qyrkúiekte buǵan deiin satyp alynǵan shetel valiýtasyn $200-300 mln kóleminde satý josparlanǵan.
Ulttyq bank málimetinshe, tamyzda altyn satyp alýdy «aina» tetigi arqyly zalalsyzdandyrý sheńberinde shamamen 374 mlrd teńge sterilizatsiialanǵan. Qyrkúiekte osy maqsatta 374 mlrd teńgege balamaly valiýta satý kútiledi.
Retteýshi Ulttyq qor qarajaty boiynsha operatsiialar júrgizý kezinde de, «aina» tetigin iske asyrý barysynda da naryqtyq beitaraptyq qaǵidaty saqtalatynyn atap ótti.
Tamyzda Ulttyq bank valiýtalyq interventsiialar júrgizbegen.
Sonymen qatar Biryńǵai jinaqtaýshy zeinetaqy qorynyń zeinetaqy aktivterindegi valiýtalyq úlesti qoldaý maqsatynda Ulttyq bank tamyzda birjalyq saýda-sattyq barysynda shetel valiýtasyn satyp aldy. Satyp alý kólemi $721 mln nemese jalpy saýda kóleminiń shamamen 8,3%-yn qurady.
Ulttyq bank budan keiingi sheshimder naryqtaǵy jaǵdaidy eskere otyryp, zeinetaqy aktivterin investitsiialyq basqarý sheńberinde qabyldanatynyn málimdedi.
Retteýshiniń baǵalaýynsha, qysqa merzimde teńge baǵamyna naryq qatysýshylarynyń kútýleri, toqsandyq salyq tólemderi, álemdik naryqtardaǵy ahýal jáne geosaiasi jaǵdaidyń ózgerýi áser etedi.
Ulttyq bank teńgeniń ikemdi baǵam qalyptastyrý rejimin ustanýdy jalǵastyrady. Retteýshiniń málimetinshe, bul rejim naryqtaǵy teńgerimsizdikterdiń jinaqtalýyna jol bermei, eldiń altyn-valiýta rezervteriniń saqtalýyn qamtamasyz etýge baǵyttalǵan.
