Kassatsiialyq sot Shymkent qalasy Ulttyq qaýipsizdik komiteti departamenti bastyǵynyń burynǵy birinshi orynbasary Manat Sarbasovqa qatysty 12 jylǵa bas bostandyǵynan aiyrý úkiminiń kúshin joidy. Is alqabilerdiń qatysýymen ótken sot talqylaýynda eleýli zań buzýshylyqtarǵa jol berilýine bailanysty qaita qaraýǵa jiberildi, dep habarlaidy dalanews.kz.
Advokat Jasulan Asylbekovtiń aitýynsha, kassatsiialyq sot alqabilerdiń daýys berý tártibi men olardyń qaraýyna usynylǵan suraqtardyń tujyrymdalýynan zań buzýshylyqtardy anyqtaǵan. Qorǵaýshy taraptyń málimdeýinshe, suraqtar kúrdeli zań terminderimen jazylyp, tipti sot protsesine qatysýshylarǵa da túsiniksiz bolǵan.
Nege.kz málimetinshe, 2025 jylǵy qazanda alqabiler Manat Sarbasovty para aldy, qylmystyq jolmen alynǵan qarajatty zańdastyrdy jáne qyzmettik mindetin tiisinshe oryndamady dep tanyǵan edi. Birneshe qylmys boiynsha oǵan túpkilikti 12 jyl bas bostandyǵynan aiyrý jazasy taǵaiyndaldy. Al alaiaqtyq jáne para berýge itermeleý sekildi basqa aiyptar boiynsha ol aqtalǵan.
Tergeý nusqasyna sáikes, Sarbasov jekemenshik mektepke qoldaý kórsetkeni úshin kásipkerden 70 million teńge alǵan. Keiin bul qarajatty jyljymaityn múlik satyp alý jáne odan tabys tabý arqyly zańdastyrdy degen aiyp taǵylǵan.
Sondai-aq ol meditsinalyq jabdyq satyp alý kezinde 92 million teńgeden astam qarajattyń jymqyrylýyna jol berip, qyzmettik áreketsizdik tanytty dep aiyptalǵan. Atalǵan epizodtar burynǵy sheneýnikter men kásipkerler de jaýapqa tartylǵan qylmystyq istiń bir bóligi bolǵan.
