Қазақстан Ұлттық қорынан қыркүйекте ішкі валюта нарығында $200-300 млн көлемінде валюта сатылады, деп хабарлайды dalanews.kz.
Ұлттық банктің мәліметінше, тамыз қорытындысы бойынша теңге бағамы 2,6%-ға нығайып, бір доллар үшін 461,57 теңгені құрады. Қазақстан қор биржасындағы (KASE) сауда-саттықтың орташа тәуліктік көлемі $389 млн-нан $415 млн-ға дейін өсті. Ай қорытындысында сауда-саттықтың жалпы көлемі $8,7 млрд болды.
Тамызда Ұлттық қордан биржалық нарықта $200 млн көлемінде валюта сатылған. Бұл жалпы сауда көлемінің 2,3%-ын немесе шамамен $9,5 млн-ды құрады.
Қыркүйекте Ұлттық банк Ұлттық қор қаражаты есебінен биржалық нарықта $200-300 млн көлемінде валюта сатуды жоспарлап отыр.
Сонымен қатар қыркүйектен бастап Ұлттық банк Ұлттық қор операцияларын ішкі валюта нарығында «айна қағидаты» бойынша жүргізуге кіріседі. Бұл тетік аясында қыркүйекте бұған дейін сатып алынған шетел валютасын $200-300 млн көлемінде сату жоспарланған.
Ұлттық банк мәліметінше, тамызда алтын сатып алуды «айна» тетігі арқылы залалсыздандыру шеңберінде шамамен 374 млрд теңге стерилизацияланған. Қыркүйекте осы мақсатта 374 млрд теңгеге баламалы валюта сату күтіледі.
Реттеуші Ұлттық қор қаражаты бойынша операциялар жүргізу кезінде де, «айна» тетігін іске асыру барысында да нарықтық бейтараптық қағидаты сақталатынын атап өтті.
Тамызда Ұлттық банк валюталық интервенциялар жүргізбеген.
Сонымен қатар Бірыңғай жинақтаушы зейнетақы қорының зейнетақы активтеріндегі валюталық үлесті қолдау мақсатында Ұлттық банк тамызда биржалық сауда-саттық барысында шетел валютасын сатып алды. Сатып алу көлемі $721 млн немесе жалпы сауда көлемінің шамамен 8,3%-ын құрады.
Ұлттық банк бұдан кейінгі шешімдер нарықтағы жағдайды ескере отырып, зейнетақы активтерін инвестициялық басқару шеңберінде қабылданатынын мәлімдеді.
Реттеушінің бағалауынша, қысқа мерзімде теңге бағамына нарық қатысушыларының күтулері, тоқсандық салық төлемдері, әлемдік нарықтардағы ахуал және геосаяси жағдайдың өзгеруі әсер етеді.
Ұлттық банк теңгенің икемді бағам қалыптастыру режимін ұстануды жалғастырады. Реттеушінің мәліметінше, бұл режим нарықтағы теңгерімсіздіктердің жинақталуына жол бермей, елдің алтын-валюта резервтерінің сақталуын қамтамасыз етуге бағытталған.
