Bas prokýratýra qazaqstandyqtardy Ulttyq Banktiń atyn paidalanyp, qarjy jymqyratyn alaiaqtardan saq bolýǵa úndedi., dep habarlaidy dalanews.kz.
Vedomstvonyń málimetinshe, sońǵy bir jarym ai ishinde osyndai 39 derek tirkelgen. Alaiaqtar ózderin Ulttyq Bank qyzmetkeri retinde tanystyryp, azamattardy túrli syltaýmen aqsha aýdarýǵa kóndiredi.
Mysaly, Jezqazǵan qalasynyń turǵynyna belgisiz adamdar habarlasyp, onyń banktik shottaryndaǵy qarajatty alaiaqtar iemdenbek bolyp jatqanyn aitqan. Keiin olar aqshany «qaýipsiz shotqa» aýdarý qajet ekenin túsindirgen. Alaiaqtardyń sózine sengen azamat depozittegi qarajatyn kórsetilgen shotqa jiberip, saldarynan 9 million teńgeden aiyrylyp qalǵan.
Bas prokýratýra memlekettik organdardyń qyzmetkerleri telefon arqyly nesie rásimdeýdi, múlikti satýdy nemese aqshany basqa shottarǵa aýdarýdy talap etpeitinin eske saldy.
Sondai-aq azamattarǵa SMS arqyly keletin rastaý kodtaryn, parolderdi, bank kartalarynyń derekterin jáne basqa da jeke málimetterdi bógde adamdarǵa jariia etpeý usynyldy.
