Qazaqstanda biryńǵai QR-kod arqyly tólem qabyldaǵan kezde kásipkerler úshin alynatyn komissiia bank kartasymen tólem jasaý komissiiasynan joǵary bolmaýy tiis, dep habarlaidy dalanews.kz.
Ulttyq bank málimetinshe, 19 shildeden bastap elimizde kez kelgen banktiń terminaly arqyly biryńǵai QR-kodpen tólem jasaýǵa múmkindik beretin bankaralyq mobildi tólem júiesi iske qosyldy. Júieniń tehnikalyq operatory – Ulttyq tólem korporatsiiasy.
Ulttyq bank satyp alýshylar úshin QR arqyly tólem jasaý tegin ekenin atap ótti. Al kásipkerler endi burynnan ornatylǵan terminal arqyly kez kelgen banktiń klientterinen QR-tólem qabyldai alady.
Eger satyp alýshy men satýshyǵa bir bank qyzmet kórsetse, komissiia mólsherlemesin sol bank ózi belgileidi. Al bankaralyq tólem kezinde komissiianyń 1 paiyzy satyp alýshynyń bankine (interchange) beriledi, qalǵan bóligi kásipkerge qyzmet kórsetetin bankke túsedi.
Sonymen qatar Ulttyq tólem korporatsiiasy bankterden de, olardyń klientterinen de telefon nómiri arqyly júzege asatyn bankaralyq aýdarymdar úshin eshqandai komissiia almaityny aityldy.
Ulttyq bank bankter tarifterdi ózderiniń infraqurylymdyq shyǵyndary men terminaldardy ustaý shyǵyndaryn eskere otyryp derbes belgileitinin, alaida retteýshi olardyń tariftik saiasatyn baqylaýda ustaitynyn málimdedi.
Sondai-aq sońǵy eki jylda halyqaralyq tólem júielerimen jáne ekinshi deńgeili banktermen birlesip bankaralyq komissiia mólsherlemeleri shamamen eki esege tómendetilgen.
Ulttyq banktiń dereginshe, jańa júie iske qosylǵan 17 shildeden beri biryńǵai QR arqyly 1 millionǵa jýyq tranzaktsiia óńdelgen. Bul qyzmettiń qazaqstandyqtar arasynda joǵary suranysqa ie ekenin kórsetedi.
