QR IIM Ulttyq ulan sarbazdary sýitsid jasamaq bolǵan qyzdy qutqaryp qaldy, dep habarlaidy Dalanews.kz.
Qoǵamdyq tártip pen qaýipsizdikti qamtamasyz etý kezinde elordalyq ulandyqtar kópirden sekirgen qyzdy qutqardy. Qutqarý týraly beineni kezdeisoq kýágerler túsirip alǵan.
Oqiǵa 2 qazan kúni keshki saǵat 22:00 shamasynda boldy. QR IIM Ulttyq ulanynyń 5573 áskeri bóliminiń jasaǵyna qala turǵyny júgirip kelip kómek suraidy.
Onyń aitýynsha, jas qyz kópirden Esil ózenine sekirip ketken. Áskeri jasaq bastyǵy qatardaǵy jaýynger Nariman Myrzahmetov, patrýlshi sarbazdar Damir Muqashev jáne David Korsýnovpen oqiǵa ornyna jedel jetip, birden qyzdy qutqara bastady.
"Qala kósheleriniń tynyshtyǵyn qadaǵalaý kezinde bizge beitanys adam kelip, qyz balanyń sýǵa batyp bara jatqanyn aitty. Biz dereý ony qutqarýǵa kiristik. Ratsiia arqyly osy oqiǵa týraly patrýldik top bastyǵyna habarladyq ta, boijetkendi sýdan shyǵarýǵa tyrystyq. Ol jaǵaǵa jaqyn qashyqtyqta bolǵandyqtan, eńkeiip, onyń qolynan ustai aldym, al áriptesterim ony jaǵaǵa shyǵarýǵa kómektesti.
Sodan keiin biz qyzdy jyly kórpe, býshlatqa orap, jedel járdem kelgenge deiin oǵan alǵashqy meditsinalyq kómek kórsettik. Kez kelgen ýaqytta kómek kórsetýge daiyn bolý — bul bizdiń mindetimiz", – dedi áskeri jasaq bastyǵy qatardaǵy Myrzahmetov.
Ulttyq ulan áskeri qyzmetshileriniń úilesimdi jáne kásibi is-qimyldary arqasynda adam ómiri aman qaldy. Sarbazdar óz qyzmetteriniń azamattardyń qaýipsizdigin qamtamasyz etýde sheshýshi ról atqaratynyn taǵy da dáleldedi.
