Búgin qazaq órkenietiniń altyn dińgegi Otyrarda «Uly Jibek joly boiyndaǵy keramika óndirisi jáne aǵash uqsatý óneri» taqyrybynda respýblikalyq qolóner sheberleriniń jármeńkesi ótip jatyr, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Qazaq eliniń óner maitalmandarynyń arasyn jaqyndata túsetin, yntymaǵyn nyǵaitatyn, dástúrli ónerin ushtastyratyn aýqym is-sharany Otyrar aýdany ákiminiń orynbasary Aidos Qulmahanov jáne «Otyrar» memlekettik arheologiialyq mýzei-qoryǵy direktory Aibek Jandosov ashyp berip, uiymdastyrýshylar men qatysýshylarǵa sáttilik tiledi.
Jármeńkeniń qadirli qonaǵy retinde shaqyrylǵan QR Mádeniet qairatkeri, Qazaqstan Qolónershiler odaǵynyń múshesi, mýzei isiniń ardageri Ryskúl Bektalieva jáne Qazaqstan Sýretshiler odaǵynyń múshesi, sýretshi, etnodizainer Kendebai Qarabdalov quttyqtaý sóz alyp, óz alǵystaryn jetkizdi. Aýdan ákimi orynbasarymen birge lentasyn qidy.
Shara barysynda ádil qazylar alqasy tanystyryldy. Olardyń qatarynda Ryskúl Bektalieva men Kendebai Qarabdalovtan bólek, «Turan-qazaq» sýretshiler konsolidatsiiasynyń múshesi, QR Mádeniet salasynyń úzdigi, belgili sýretshi Ádilhan Málik, Otyrar aýdandyq mádeniet, tilderdi damytý, dene shynyqtyrý jáne sport bóliminiń basshysy Saǵyntai Quttybai, «Otyrar» memlekettik arheologiialyq mýzei-qoryǵynyń direktorynyń ǵylymi ister jónindegi orynbasary Eraly Shoqai bar.
Aita keteiik, QR Mádeniet jáne aqparat ministrligi jáne Otyrar aýdany ákimdiginiń qoldaýymen, «Otyrar» memlekettik arheologiialyq mýzei-qoryǵy uiymdastyrǵan respýblikalyq jármeńke keshke deiin jalǵasady. Ozyq úlgidegi týyndylar ádil qazylardyń sheshimimen saralanyp, úzdik dep tanylǵan qolóner sheberlerine jabylý saltanatynda arnaiy taǵaiyndalǵan alǵys hattar men júldeli syilyqtar tabystalady.
