بۇگىن قازاق وركەنيەتىنىڭ التىن دىڭگەگى وتىراردا «ۇلى جىبەك جولى بويىنداعى كەراميكا ءوندىرىسى جانە اعاش ۇقساتۋ ونەرى» تاقىرىبىندا رەسپۋبليكالىق قولونەر شەبەرلەرىنىڭ جارمەڭكەسى ءوتىپ جاتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
قازاق ەلىنىڭ ونەر مايتالماندارىنىڭ اراسىن جاقىنداتا تۇسەتىن، ىنتىماعىن نىعايتاتىن، ءداستۇرلى ونەرىن ۇشتاستىراتىن اۋقىم ءىس-شارانى وتىرار اۋدانى اكىمىنىڭ ورىنباسارى ايدوس قۇلماحانوۆ جانە «وتىرار» مەملەكەتتىك ارحەولوگيالىق مۋزەي-قورىعى ديرەكتورى ايبەك جاندوسوۆ اشىپ بەرىپ، ۇيىمداستىرۋشىلار مەن قاتىسۋشىلارعا ساتتىلىك تىلەدى.
جارمەڭكەنىڭ ءقادىرلى قوناعى رەتىندە شاقىرىلعان ق ر مادەنيەت قايراتكەرى، قازاقستان قولونەرشىلەر وداعىنىڭ مۇشەسى، مۋزەي ءىسىنىڭ ارداگەرى رىسكۇل بەكتالييەۆا جانە قازاقستان سۋرەتشىلەر وداعىنىڭ مۇشەسى، سۋرەتشى، ەتنوديزاينەر كەندەباي قارابدالوۆ قۇتتىقتاۋ ءسوز الىپ، ءوز العىستارىن جەتكىزدى. اۋدان اكىمى ورىنباسارىمەن بىرگە لەنتاسىن قيدى.
شارا بارىسىندا ءادىل قازىلار القاسى تانىستىرىلدى. ولاردىڭ قاتارىندا رىسكۇل بەكتالييەۆا مەن كەندەباي قارابدالوۆتان بولەك، «تۇران-قازاق» سۋرەتشىلەر كونسوليداسياسىنىڭ مۇشەسى، ق ر مادەنيەت سالاسىنىڭ ۇزدىگى، بەلگىلى سۋرەتشى ءادىلحان مالىك، وتىرار اۋداندىق مادەنيەت، تىلدەردى دامىتۋ، دەنە شىنىقتىرۋ جانە سپورت ءبولىمىنىڭ باسشىسى ساعىنتاي قۇتتىباي، «وتىرار» مەملەكەتتىك ارحەولوگيالىق مۋزەي-قورىعىنىڭ ديرەكتورىنىڭ عىلىمي ىستەر جونىندەگى ورىنباسارى ەرالى شوقاي بار.
سالتاناتتى جيىن ءارى قاراي ارنايى دايىندالعان كونسەرتتىك باعدارلاماعا ۇلاستى. سودان سوڭ ەلىمىزدىڭ تۇكپىر-تۇكپىرىنەن جينالعان 30-دان استام كەراميكا جانە اعاش ۇقساتۋ ونەرىنىڭ حاس شەبەرلەرىنىڭ قولونەر بۇيىمدارى تانىستىرىلدى. جارمەڭكە بارىسىندا شەبەرلىك ساعاتتارى ۇيىمداستىرىلىپ، كوپشىلىككە اتادان مۇرا بولعان ونەر كەڭىنەن ناسيحاتتالىپ جاتىر.
ايتا كەتەيىك، ق ر مادەنيەت جانە اقپارات مينيسترلىگى جانە وتىرار اۋدانى اكىمدىگىنىڭ قولداۋىمەن، «وتىرار» مەملەكەتتىك ارحەولوگيالىق مۋزەي-قورىعى ۇيىمداستىرعان رەسپۋبليكالىق جارمەڭكە كەشكە دەيىن جالعاسادى. وزىق ۇلگىدەگى تۋىندىلار ءادىل قازىلاردىڭ شەشىمىمەن سارالانىپ، ۇزدىك دەپ تانىلعان قولونەر شەبەرلەرىنە جابىلۋ سالتاناتىندا ارنايى تاعايىندالعان العىس حاتتار مەن جۇلدەلى سىيلىقتار تابىستالادى.
