Búgin Májiliste Ulttyq bank tóraǵasy Timýr Súleimenov Ulttyq qordyń qarajaty esebinen ulttyq kompaniialardyń aktsiialaryn satylyp alynýyna qatysty egjei-tegjeili málimet usyndy, dep habarlaidy Dalanews.kz.
Naqtyraq aitqanda, Timýr Súleimenov Ulttyq qordyń qarajatyna "QazMunaiGaz" jáne "Qazatomónerkásip" aktsiialaryn satyp alýǵa qatysty pikir bildirdi.
"Iá, bul paidalanatyndai sondai keremet turaqty qural emes shyǵar. Degenmen, jasalǵan bul eki investitsiia aitarlyqtai tabys ákeldi. Biraq, júieli qural retinde, bul arada depýtattarmen kelisemin, ony paidalanýdyń qajeti joq. Bul Ulttyq qordyń mindetine jatpaidy", - dedi ol.
Súleimenov 2023 jyly Ulttyq qor qarajaty esebinen 1,3 trln teńgege "QazMunaiGaz" AQ aktsiialary satyp alynǵanyn eske saldy.
"Iá, shynymen de bul fiskaldyq máselelerge bailanysty boldy. Biraq, is júzinde, munyń investitsiia ekenin basa atap ótkim keledi. Iaǵni, biz 1,3 trln teńge investitsiialasaq, al qazir bul pakettiń quny shamamen 1,7 trln teńgeni quraidy, iaǵni 400 mlrd teńge Ulttyq qorǵa qosymsha tabys kelip tur. Bul jaman emes qoi. Biylǵy jyldyń shilde aiynda týra osylai 467 mlrd teńgege "Qazatomónerkásip" AQ aktsiialary satyp alyndy. Bul tabysty kompaniia ári onyń aktsiialary jaqsy satylady. Qazir bul investitsiiamyz 600 mlrd teńgege baǵalanýda", - dedi ol.
Buǵan deiin Timýr Súleimenovtyń Ulttyq qor naryqtyq emes sharttarda EDB obligatsiialaryn satyp alý arqyly shamamen 2 trln teńge joǵaltty dep aitqanyn jazǵan bolatynbyz. Sondai-aq Halyk Finance Basqarma tóraǵasynyń keńesshisi Murat Temirhanov Qazaqstanda "memlekettik kapitalizm" dep atalatyn ekonomikalyq júie qalyptasqanyn aityp, úlken zertteý jariialady.
