Jetisý oblysynda Ulttyq kitap kúni merekesine orai túrli formatta is-sharalar ótkizilýde. Sonyń ishinde chellendjder, býkkrossing aktsiiasy, kompozitsiia keshteri, konferentsiia, saiahat sabaǵy, kezdesýler, kitap kórmeleri men jármeńkeler jáne basqalaryn atap ótýge bolady, dep habarlaidy Dalanews.kz.
- Ulttyq kitap kúni Memleket basshysynyń bastamasymen 2024 jyldan beri atalyp ótilýde. Oblysta jalpy sany 150 kitaphana bolsa, kitap kúnine arnalǵan is-sharalar solardyń barlyǵynda belsendi ótkizilip jatyr. Biz tek basqosýlarmen shektelmei, qazirgi zamanǵy jańa formattardy da keńinen qoldanamyz. Bul rette ásirese jastardyń qyzyǵýshylyǵy úlken ekeni baiqalady, oǵan biz qýanamyz. Jastardyń kitapqa degen súiispenshiligin oiatý arqyly olardy mádeni-rýhani, aǵartýshylyq-tanymdyq turǵyda damytýǵa, oi kókjiegin keńeitýge yqpal etýge bolady, - dedi oblystyq mádeniet, arhivter jáne qujattama basqarmasynyń basshysy Qýanysh Súleimenov.
Máselen, Sáken Seifýllin atyndaǵy ortalyq kitaphana «Kitap jáne pikir alańy» atty talqylaý keshin, «Ólke avtorlary – álem tilinde» atty ádebi podkast, «Kim tapqyr?» ziiatkerlik oiynyn uiymdastyrsa, Kóksý aýdandyq kitaphanasynda «Búgingi trend – kitap oqý» kitap kórmesi, «Tapqyr bolsań, taýyp kór» viktorinalyq oiyny, «Jańa kitaptar» defilesi, «Ǵasyrlar tartysy: kitap pen smartfon» atty sahnalyq kórinis usynyldy.
Munda qazaq jáne shetel ádebieti klassikteriniń shyǵarmalaryndaǵy keiipkerler, kitapqa qatysty basqa da saýaldar qoiylyp, ózara pikir almasyldy. Jańa kitaptar men sirek kezdesetin kitaptardyń danalary tanystyrylyp, kórseildi, kitap pen zamanaýi gadjetterdiń artyqshylyǵy men kemshiligi talqylandy.
Atalǵan is-sharalarǵa jergilikti mektep oqýshylary, kitaphana oqyrmandary, qalamgerler, jalpy kitapsúier qaýym qatysty.
- «Kitap jáne pikir alańy» keshi óte mazmundy ári qyzyqty ótti. Kitapqa bailanysty sózderdiń oryndary aýystyrylyp jazylǵan áripterden durys sóz qurastyryp jarystyq, jasyrǵan san túrli keiipkerlerdi taptyq, óz oiymyzdy erkin jetkizip, kitapqa qatysty túrli kózqarastarmen tanystyq. Men Seifýllin atyndaǵy kitaphanaǵa turaqty kelemin. Osyndai qyzyqty keshterden keiin kitap oqýǵa degen qyzyǵýshylyǵymyz arta tústi, - deidi jas oqyrman, Taldyqorǵan qalasyndaǵy № 15 mekteptiń 7-synyp oqýshysy Aiajan Sábitqyzy.
Osy sharalarǵa belsendi qatysyp júrgen «Mizam» jyljymaly ádebi mekteptiń ókilderi de pikir bildirdi.
- Biz qurǵan «Mizam» mektebi kitap oqytýdyń túrli ádisterin barynsha qamtyp, osyndai is-sharalardyń basy-qasynan únemi tabylady. «Mizam» mektebi – jai ǵana ádebi orta emes, ol – kitap arqyly tulǵa qalyptastyratyn rýhani alań. Bizdiń maqsatymyz - oqýdy mindet emes, ómir saltyna ainaldyrý. Kitap oqý – tek mátindi túsiný ǵana emes, keiipkermen birge oi keshý, avtordyń álemine ený, óz bolmysyńdy taný. Osyndai tásildiń arqasynda oqýshylardyń sózdik qory baiyp, oilaý qabileti tereńdep, rýhani kókjiegi keńeiedi, - deidi «Mizam» ádebi jyljymaly mektebiniń dáriskeri, aqyn Muhtar Kúmisbek.
Ulttyq kitap kúniniń mańyzyn arttyrý, sol arqyly qoǵamda kitap oqý mádenietin qalyptastyrý maqsatynda qolǵa alynǵan mundai is-sharalar barlyq aýdan-qalalardy qamtydy.
