Ulttyq gospital Sara Alpysqyzynyń jaǵdaiy týraly aitty, dep habarlaidy Dalanews.kz.
Tengrinews.kz saýalyna jaýabynda Prezident Is basqarmasy Meditsinalyq ortalyǵynyń Ulttyq gospitali Sara Nazarbaevaǵa qatysty pikir bildirgen.
"Naýqastyń ólimi týraly aqparat shyndyqqa janaspaidy. Naýqas Ulttyq gospitalde emdelip jatyr", - dep jazylǵan Ulttyq gospitaldiń Tengrinews.kz-ke bergen jaýabynda.
Mekeme "Densaýlyq saqtaý jáne densaýlyq saqtaý júiesi týraly" Qazaqstan Respýblikasy kodeksiniń 273-babyna sáikes diagnozǵa, densaýlyqqa qatysty málimetter dárigerlik qupiia ekenin málimdedi.
Aita keteiik, keshe Tuńǵysh prezident Nursultan Nazarbaevtyń keńesshisi ári baspasóz hatshysy Aidos Úkibai BAQ-ta tarap jatqan aqparatqa pikir bildirip, Sara Nazarbaeva aman ekenin málimdedi.
Sara Nazarbaeva týraly ne belgili?
Sara Alpysqyzy Nazarbaeva (qazirgi tegi – Qonaqaeva) - Qazaqstannyń tuńǵysh prezidenti Nursultan Nazarbaevtyń jubaiy, qoǵam qairatkeri. Ol 1941 jyly Qaraǵandy oblysynda dúniege kelgen. Joǵary bilim alyp, injener-metallýrg mamandyǵy boiynsha eńbek etken.
1962 jyly Nursultan Nazarbaevpen otaý qurǵan. Erli-zaiyptynyń úsh qyzy bar: Dariǵa, Dinara jáne Áliia.
Sara Alpysqyzy biraz ýaqyttan beri qoǵamdyq ómirge sirek aralasyp, saiasi sahnadan tys qaldy. Ol kópshilik aldynda jii kórinbei ketti.
1992 jyly ol "Bóbek" halyqaralyq balalar qaiyrymdylyq qoryn qurdy. Bul qordyń maqsaty – jetim, múmkindigi shekteýli jáne áleýmettik turǵyda osal toptaǵy balalarǵa jan-jaqty kómek kórsetý. Sonymen qatar, onyń bastamasymen elimizdegi mektepterde "Ózin-ózi taný" páni engizildi. Keiin bul pán oqý baǵdarlamasynan alyp tastaldy. Sara Alpysqyzynyń bastamasymen Qazaqstanda "SOS – balalar aýyldary" halyqaralyq jobasy iske asty.
Keiingi jyldary ol burynǵy tegin ózgertip, qyz kezindegi tegi Qonaqaevany qaita alǵany belgili boldy.
Oǵan qosa biraz jyldan beri Saranyń ózine qaraǵanda qyzdary jii jurt nazarynda. Tipti byltyr da Sara Nazarbaeva qaitys bolǵany týraly aqparat tarady. Keiinirek tuńǵysh prezident Nursultan Nazarbaevtyń keńesshisi ári baspasóz hatshysy Aidos Úkibai bul aqparat shyndyqqa janaspaitynyn málimdedi.
