ۇلتتىق گوسپيتال سارا الپىس قىزىنىڭ جاعدايى تۋرالى ايتتى، دەپ حابارلايدى Dalanews.kz.
Tengrinews.kz ساۋالىنا جاۋابىندا پرەزيدەنت ءىس باسقارماسى مەديسينالىق ورتالىعىنىڭ ۇلتتىق گوسپيتالى سارا نازاربايەۆاعا قاتىستى پىكىر بىلدىرگەن.
"ناۋقاستىڭ ءولىمى تۋرالى اقپارات شىندىققا جاناسپايدى. ناۋقاس ۇلتتىق گوسپيتالدە ەمدەلىپ جاتىر"، - دەپ جازىلعان ۇلتتىق گوسپيتالدىڭ Tengrinews.kz-كە بەرگەن جاۋابىندا.
مەكەمە "دەنساۋلىق ساقتاۋ جانە دەنساۋلىق ساقتاۋ جۇيەسى تۋرالى" قازاقستان رەسپۋبليكاسى كودەكسىنىڭ 273-بابىنا سايكەس دياگنوزعا، دەنساۋلىققا قاتىستى مالىمەتتەر دارىگەرلىك قۇپيا ەكەنىن مالىمدەدى.
ايتا كەتەيىك، كەشە تۇڭعىش پرەزيدەنت نۇرسۇلتان نازاربايەۆتىڭ كەڭەسشىسى ءارى باسپا ءسوز حاتشىسى ايدوس ۇكىباي باق-تا تاراپ جاتقان اقپاراتقا پىكىر ءبىلدىرىپ، سارا نازاربايەۆا امان ەكەنىن مالىمدەدى.
سارا نازاربايەۆا تۋرالى نە بەلگىلى؟
سارا الپىس قىزى نازاربايەۆا (قازىرگى تەگى – قوناقايەۆا) - قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ جۇبايى، قوعام قايراتكەرى. ول 1941 جىلى قاراعاندى وبلىسىندا دۇنيەگە كەلگەن. جوعارى ءبىلىم الىپ، ينجەنەر-مەتاللۋرگ ماماندىعى بويىنشا ەڭبەك ەتكەن.
1962 جىلى نۇرسۇلتان نازاربايەۆپەن وتاۋ قۇرعان. ەرلى-زايىپتىنىڭ ءۇش قىزى بار: داريعا، دينارا جانە ءاليا.
سارا الپىس قىزى ءبىراز ۋاقىتتان بەرى قوعامدىق ومىرگە سيرەك ارالاسىپ، ساياسي ساحنادان تىس قالدى. ول كوپشىلىك الدىندا ءجيى كورىنبەي كەتتى.
1992 جىلى ول "بوبەك" حالىقارالىق بالالار قايىرىمدىلىق قورىن قۇردى. بۇل قوردىڭ ماقساتى – جەتىم، مۇمكىندىگى شەكتەۋلى جانە الەۋمەتتىك تۇرعىدا وسال توپتاعى بالالارعا جان-جاقتى كومەك كورسەتۋ. سونىمەن قاتار، ونىڭ باستاماسىمەن ەلىمىزدەگى مەكتەپتەردە "ءوزىن-وزى تانۋ" ءپانى ەنگىزىلدى. كەيىن بۇل ءپان وقۋ باعدارلاماسىنان الىپ تاستالدى. سارا الپىس قىزىنىڭ باستاماسىمەن قازاقستاندا "SOS – بالالار اۋىلدارى" حالىقارالىق جوباسى ىسكە استى.
كەيىنگى جىلدارى ول بۇرىنعى تەگىن وزگەرتىپ، قىز كەزىندەگى تەگى قوناقايەۆانى قايتا العانى بەلگىلى بولدى.
وعان قوسا ءبىراز جىلدان بەرى سارانىڭ وزىنە قاراعاندا قىزدارى ءجيى جۇرت نازارىندا. ءتىپتى بىلتىر دا سارا نازاربايەۆا قايتىس بولعانى تۋرالى اقپارات تارادى. كەيىنىرەك تۇڭعىش پرەزيدەنت نۇرسۇلتان نازاربايەۆتىڭ كەڭەسشىسى ءارى باسپا ءسوز حاتشىسى ايدوس ۇكىباي بۇل اقپارات شىندىققا جاناسپايتىنىن مالىمدەدى.
