Depýtat Ashat Aimaǵambetov Salyq kodeksindegi qymbatshylyq týdyratyn normaǵa erekshe toqtalyp, oǵan Ulttyq bankten bastap, qarjygerler qaýymdastyǵy, sarapshylar, tipti "Atameken" ulttyq kásipkerler palatasy da qarsy bolyp jatqanyna qaramastan onyń qabyldaný yqtimaldylyǵy joǵary ekenin aitady.Eń bastysy, bul norma qabyldansa, banktik aqsha aýdarymdary 12%-ǵa qymbattap ári ár azamatqa aitarlyqtai áser etetin bolady, dep habarlaidy Dalanews.kz.
"Kartadan basqa kartaǵa aqsha aýdarǵany úshin komissiia 150 teńge boldy. Al endi, jańa Salyq kodeksi jobasynda usynylǵan norma qabyldansa, mundai aýdarymdar shamamen 12%-ǵa qymbattaýy múmkin. Bul – Ekonomika ministrliginiń tólem operatsiialaryn QQS-qa (NDS) salýǵa qatysty jospary. Plastikalyq kartochalardy paidalaný, kartochadan kartochkaǵa aýdarymdar, shottan shotqa aýdarymdar, tólemder men banktik qyzmetter aitarlyqtai qymbattaýy múmkin. Ekonomika ministrligi bul shyǵyndardy bankter ózderi jabady dep málimdeidi, biraq ashyǵyn aitsaq – bul shyndyqqa janaspaidy", - dep jazdy Ashat Aimaǵambetov Telegram-daǵy arnasynda.
Ol bul normaǵa 🫵Ulttyq bank, Qarjygerler qaýymdastyǵy, sarapshylar, tipti "Atameken" ulttyq kásipkerler palatasy da qarsy shyqqanyn, soǵan qaramastan, ulttyq ekonomika ministrligi bul normany Salyq kodeksi jobasyna qosyp otyrǵanyna basa nazar aýdartady.
"Mundai ózgerister tek bizdiń shyǵyndarymyzdy kóbeitip qana qoimaidy, sonymen qatar qarjy júiesine degen senimdi de álsiretedi. Bul bastama árbir azamatqa áser etedi. Biz bul normany ózgertý úshin óz túzetýlerimizdi engizdik. Halyqtyń moinyna osyndai salyq júkteýdi ádil dep sanaýǵa bola ma", - deidi depýtat.
Depýtattyń bul jazbasy qoǵamda rezonans týǵyzǵannan keiin quzyrly vedomstvo buǵan qatysty túsinikteme berýge májbúr boldy.
Azamattardyń banktik aýdarymdaryna qosylǵan qun salyǵyna salyq salý týraly aqparattyń taralýyna bailanysty QR Ulttyq ekonomika ministrligi mynany habarlaidy:
"Iaǵni, bankter óz qyzmetteri úshin klientterden alatyn komissiialarǵa salyq salý (QQS) jóninde aityp otyrmyz. Mysaly, kartany shyǵarý úshin nemese aýdarymdar úshin bank alatyn komissiialar. Jańa Salyq kodeksiniń jobasynda ekinshi deńgeidegi bankterdiń qarjylyq operatsiialaryna qoldanystaǵy jeńildikti joiý jónindegi norma usynylady. Azamattar júzege asyratyn aýdarymdardyń ózine salyq salynbaidy. Eger bir banktiń ishindegi aqsha aýdarymdary komissiiasyz júzege asyrylsa, tiisinshe mundai jaǵdailarda salyq salynbaidy. Jańa Salyq kodeksiniń jobasy talqylaý satysynda turǵandyǵyn eske sala keteiik. Usynylǵan normalar Parlamentte, biznes-qoǵamdastyqpen jáne jurtshylyqpen talqylanýda", delingen túsiniktemede.
Sondai-aq Kodekstiń sońǵy jobasy 2025 jyly qabyldanatyny eske salynady. Iaǵni, bul norma áli qabyldanǵan joq, áli talqylaý deńgeii barysynda.
Ministrlik usynǵan túsiniktemeni bir sóilemmen jetkizsek, olar bul norma qabyldanǵan jaǵdaida salmaq áste qarapaiym el azamattaryna emes, bank sektoryna túsetinin basa kórsetedi.
Al Májilis depýtaty Ashat Aimaǵambetov munymen esh kelispeidi:
"Bankter eshqashan shyǵyndardy óz esebinen jaýyp qalmaidy. Olar mindetti túrde bul shyǵyndardy klientterdiń moinyna artatyn bolady. Óitkeni bankter – qaiyrymdylyq uiymdary emes".
Aita ketsek, ulttyq ekonomika vitse-ministri Azamat Amrin 29 qarashada Májilis qabyrǵasynda jańa Salyq kodeksi jobasyn tanystyra otyryp, 128 salyqtyq jeńildikti alyp tastaý usynylǵanyn aitty. Onyń aitýynsha, Memleket basshysy salyqtyq jeńildikterdi 20 paiyzǵa qysqartý týraly tapsyrma bergen.
