Ulttyq bank zeinetaqy aktivteriniń bir bóligi kiristiligi infliatsiia deńgeiine bailanǵan AQSh-tyń memlekettik baǵaly qaǵazdaryna investitsiialanatynyn joqqa shyǵarmaidy. Bul týraly onlain-konferentsiia barysynda QR UB Monetarlyq operatsiialar departamentiniń direktory Nurjan Tursynhanov aitty, dep habarlaidy Dalanews.kz.
"Biz buǵan deiin Ulttyq qordyń aktivterin basqarý sheńberinde AQSh MBQ-nyń infliatsiialyq obligatsiialary (Tips) siiaqty quraldy paidalanýǵa nietti ekenimizdi habarlaǵan bolatynbyz. Qazir biz bul máselemen belsendi ainalysyp jatyrmyz. Osy bastamany Ulttyq qorǵa engizgennen keiin aǵymdaǵy jyl ishinde biz zeinetaqy aktivteri úshin de osyndai quraldy qarastyratynymyzdy joqqa shyǵarmaimyn", - dedi Nurjan Tursynhanov.
Ol qazirgi ýaqytta zeinetaqy aktivteriniń 40%-y valiýtalyq quraldarda shoǵyrlanǵanyn aitady.
"Valiýta komponentiniń qurylymynda damyǵan elderdiń baǵaly qaǵazdary da, AQSh-tyń memlekettik obligatsiialary, onyń ishinde kiristiligi tirkelgen qaǵazdar da bar. Mundai kiristilik degen óte jaqsy dúnie, máselen AQSh-tyń 10 jyldyq obligatsiialary boiynsha 4,2%. Barlyq osyndai qaǵazdardyń úlesi valiýtalyq quraldar úlesiniń 30%-yn quraidy (zeinetaqy aktivteri-red.). Eger kiristiligi infliatsiiaǵa bailanǵan infliatsiialyq obligatsiialardy satyp alsaq, onda mundai qaǵazdarda kiristilik turaqty bolmaidy. Bul óte mańyzdy jait, ásirese álemdik tarifter soǵysynan keiin (Donald Tramp aitqan bastamalar) infliatsiia jedeldei túskende", - deidi sarapshy.
Onyń aitýynsha, zeinetaqy aktivteriniń 60%-y teńgelik quraldarǵa, onyń ishinde memlekettik jáne korporativtik baǵaly qaǵazdarǵa salynǵan.
"Ózgermeli kiristiligi bar qaǵazdar boiynsha aitatyn bolsaq, jaqynda ǵana Qarjy ministrliginiń kiristiligi infliatsiiaǵa bailanǵan MBQ-lar boiynsha aýktsion júrgizildi. Bul tásil barlyq emitentterdiń, "Samuryq-Qazyna" UÁQ, "Báiterek" UBH, bankterdiń quraldarymen de jumys isteidi. Biz ótken jyly EDB obligatsiialaryna shamamen 220 mlrd teńge (zeinetaqy aktivteri) investitsiialadyq, 2026 jyly ekinshi deńgeidegi bankterdiń 7 jyldyq obligatsiialaryna 500 mlrd teńge salýdy josparlap otyrmyz. Biz olarǵa eki tásildi tańdaýǵa usyndyq: baǵaly qaǵazdar boiynsha tirkelgen nemese ózgermeli mólsherlemeni belgileýdi", - dep naqtylady Nurjan Tursynhanov.
Ulttyq Bank Qazaqstanda infraqurylymdyq jobalarǵa 1,5 trln teńge zeinetaqy aktivterin investitsiialaý josparlanyp otyrǵanyn eske saldy.
"Salymshylardy sabyrǵa shaqyrǵym keledi: mundai jobalarǵa investitsiia salǵan kezde biz úshin emitent mańyzdy. Bul "Samuryq-Qazyna" UÁQ-nyń jáne onyń enshilesteriniń nemese reitingige ie "Báiterektiń" óziniń jobalary bolýy múmkin. Bul jait áli talqy barysynda. Bul artynda memleket turǵan senimdi emitentter, sondyqtan salymshylarǵa qatty alańdaýǵa negiz joq", - dep esepteidi Nurjan Tursynhanov.
Ol buǵan deiin 400 mlrd teńgeniń zeinetaqy aktivteri belgili bir jobalarǵa investitsiialanǵanyn eske saldy.
"Biylǵy jyly investitsiialaýǵa bos qarajat bar. Qazir bizde "Samuryq-Qazyna" memlekettik qorynyń energetika salasyna qatysty birqatar jobalary belsendi pysyqtalýda. Biz jyl basynda kóktemgi dala jumystary úshin"Báiterek" UBH obligatsiialaryn satyp aldyq. Biraq olar óte qysqa, ol arada 1-1,5 jyl týraly sóz boldy. Jalpy, "Báiterekte" de, "Samuryq-Qazynada" da óte kóp aýqymdy investitsiialyq jobalar bar. Biraq salymshylar úshin olardyń kólemi de, máni de mańyzdy emes, bul arada kiristiligi mańyzdy. Biz zeinetaqy aktivterin tek naryqtyq sharttar boiynsha investitsiialaimyz... Bizdiń josparymyz - zeinetaqy aktivteri boiynsha naqty kiristilikti qamtamasyz etý. Mysaly, qysqa merzimdi MBQ boiynsha infliatsiia 10% bolǵan kezindegi kiristilik 15-15, 5% quraidy. Uzaq merzimdi 10 jyldyq MBQ boiynsha kiristilik 14-14, 2%-ǵa deiin jetedi. Osy jaǵynan alǵanda, baǵaly qaǵazdar boiynsha naqty tabystylyq oń sipatqa ie", - dep sózin túiindedi Nurjan Tursynhanov.
Treasury Inflation-Protected Securities (TIPS) — AQSh-tyń infliatsiiadan qorǵalǵan memlekettik baǵaly qaǵazdarynyń bir túri. Mundai qaǵazdar boiynsha kýpondyq tólemder ár alty ai saiyn júrgiziledi. Obligatsiianyń nominaly jarty jylda bir ret tutyný baǵalarynyń indeksine (CPI) sáikes AQSh-tyń resmi infliatsiia deńgeiine sáikes indeksteledi. TIPS osyndai qaǵazdy ustaýshylardy infliatsiiadan qorǵap, túsken naqty tabystyń saqtalýyn qamtamasyz etedi.
