QR Ulttyq Banktyń tóraǵasy Timýr Súleimenov arnaiy brifing barysynda keibir kommýnaldyq tarifterdi ósirýdi keiinge shegerý týraly Úkimet sheshimin "durys ári oryndy" dep baǵalady. Onyń aitýynsha, bastapqyda tarifti kóterý jaily sheshim qabyldanǵanda, infliatsiialyq qysym dál qazirgidei joǵary bolmaǵan. Sol kezde salyq reformasyna qatysty da anyqtyq bolmady, al jahandyq saýda júieleriniń túbegeili ózgeriske ushyraitynyn eshkim boljai alǵan joq. Sondyqtan tarif reformasy tym optimistik josparmen jasalǵan, dep habarlaidy Dalanews.kz.
Qazir sol josparlardy qaita qarap, qarqyndy báseńdetý – shyn máninde aqylǵa qonymdy qadam.
"Búgingi tarifter tek tikelei infliatsiiaǵa áser etip qana qoimai, ekinshi deńgeili tolqyndy da qozǵaidy. Iaǵni, jaryq pen jylýdyń qymbattaǵanda biznes muny taýarlarǵa degen ózindik qunyna júkteidi, ol óz kezeginde taýarlar men qyzmet baǵasyn da kótere túsedi. Sondyqtan tarifti ósirý sharasyn keiinge shegerý – aqylǵa qonymdy sheshim", – dedi Súleimenov.
Onyń aitýynsha, retteletin qyzmetter ósiminiń infliatsiiadaǵy úlesi Úkimet josparyna sáikes 1,32% deńgeiinde bolýy tiis. Iaǵni, infliatsiianyń jalpy kórsetkishindegi 1,32% tabiǵi monopoliia tarifteriniń úlesine tiesili. Endi olar bul kólemdi 0,8%-ǵa tómendetý týraly sheshim qabyldady, iaǵni jarty paiyzǵa. Bul - tikelei áserdiń ózi ǵana.
Sonymen qatar ol Qazaqstanda retteletin qyzmetterdiń baǵasy kóbine infliatsiia qarqynynan tómen bolýǵa tiis ekenin eske salady.
"Eger kerisinshe bolsa, mundai tarifter turaqty infliatsiialyq faktorǵa ainalyp ketýi múmkin. Al úkimettiń sońǵy sheshimi, kerisinshe – dezinfliatsiialyq qysym týdyrady. Bul – baǵanyń tómendeýine jol ashatyn belgi. Iaǵni, budan keiin baǵalar tómendeýi kerek", - deidi ol.
Aita keteiik, buǵan deiin Súleimenov infliatsiia boiynsha boljamdy qaita-qaita ózgertýge bolmaitynyn aityp, Ulttyq bank ustanatyn infliatsiialyq mejeniń – 5% ekenin eskertken.
